Durant 4 sesidas d'in di ha la cumissiun predeliberanta sut la
direcziun dal president da cumissiun Markus Feltscher ed en
preschientscha da cussegliera guvernativa dr. Eveline Widmer-Schlumpf sa
fatschentà cun il pachet da structura, d'examinaziun da prestaziun sco
er da spargn. Il medem volumen da respargn duai vegnir cuntanschì sin
ina via midada levamain.
Tut las 212 mesiras èn vegnidas tractadas. En quest connex han las
deputadas ed ils deputads al cussegl grond fatg vivamain diever da la
pussaivladad d'interrogar supplementarmain ils schefs dals departaments
- ch'eran envidads aposta per quai - davart singulas mesiras e da
s'infurmar globalmain er davart il fund da singulas mesiras. La
cumissiun predeliberanta da sia vart ha fatg 28 propostas
supplementaras, da las qualas pli che la mesadad èn vegnidas
surpigliadas da la regenza u duain vegnir preschentadas al parlament.
La cumissiun predeliberanta renconuscha la gronda lavur che
l'administraziun e la regenza han prestà tar la realisaziun da las
propostas da mesiras. Ella va da princip d'accord cun la directiva
politica e strategica dal project. L'incumbensa dal cussegl grond, da
far in pachet da mesiras che permetta da metter en urden l'economia da
finanzas senza auzar la taglia, è vegnida ademplida cun il messadi
preschent e cun las mesiras supplementaras da la cumissiun. Per pudair
realisar l'incumbensa ston ins exequir consequentamain las mesiras
proponidas, e quai senza reducziuns essenzialas. La cumissiun è
conscienta che spargnar fa mal. Tut ils secturs publics èn pertutgads da
las mesiras da spargn. Duai l'intent principal da spargnar vegnir
cuntanschì, na dastgan ins betg eliminar singuls elements dal pachet.
Or da quests motivs accepta la cumissiun predeliberanta er quasi tut
las mesiras contestadas ch'èn gia vegnidas discussiunadas intensivamain
en la publicitad. En cumparaziun cun il messadi dal cussegl guvernativ
metta la cumissiun però la paisa in pau auter. Ils custs da persunal en
il sectur da l'administraziun duain vegnir sbassads pli ferm e las
investiziuns ch'èn impurtantas per l'economia publica duain vegnir
reducidas main. Da la vart da las entradas duai il grad da garanzia dals
custs per cussegliaziuns agriculas vegnir auzà. Plinavant èsi prevesì da
reducir il standard d'amplificaziun da vias da colliaziun e d'engrevgiar
pli pauc il traffic public. En il sectur da construcziun bassa
localisescha la cumissiun predeliberanta potenzial supplementar per
spargnar.
Il cussegl grond vegn a cussegliar durant la sessiun da zercladur
2003 il messadi davart l'examinaziun da la structura e da las
prestaziuns per sanar las finanzas dal chantun.
Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond