La confederaziun vul agir cun la lescha federala davart mesiras
cunter rassissem, hooliganissem e propaganda violenta a moda pli decisa
cunter delicts da violenza. La regenza dal Grischun sustegna en sia
consultaziun a l'uffizi federal da polizia da princip tut las stentas
per ina persecuziun penala speditiva ed effizienta. Però pretenda la
regenza ina precisiun dal chomp d'applicaziun. L'istorgia dals origins e
la formulaziun dal text da la nova lescha implitgeschan er autras furmas
da violenza. Quellas ston, almain en ina furma generala, esser
preschentas en la lescha. Perencunter duai però vegnir desistì da numnar
novs fenomens criminologics che n'èn giuridicamain betg definids sco il
"hooliganissem". Tals fenomens ston dentant vegnir explitgads en il
diever, quai che ha per consequenza che las disposiziuns n'èn betg pli
uschè favuraivlas per ils utilisaders.
Plinavant pretenda la regenza er in instrument pli effizient per
impedir propaganda da violenza en l'internet. Sco proposta numna ella
per exempel la pussaivladad da serrar directamain per decret las paginas
d'internet correspundentas tar ils providers d'internet e na mo da
"recumandar" da far quai.
Il Grischun a l'OLMA 2003
La regenza ha approvà il budget da project da 650'000 francs per la
participaziun dal Grischun a l'OLMA 2003. Il concept da detagl per la
cumparsa dal chantun sco giast d'onur vegn elavurà en collavuraziun dal
departement da l'intern e da l'economia publica, da Grischun vacanzas,
da l'uffizi d'agricultura, megliuraziun da structura e mesiraziun sco er
dal Plantahof.
Il post da regladi da la VR a Landquart vegn integrà en il nov RCC
A partir da l'atun 2004 vegn il post da regladi da las Viasfier
federalas VFF da Landquart telecumandà nà da Cuira. La controlla dal
post da regladi da la Viafier retica VR da Landquart tras il nov center
da telecumond (Rail Control Center RCC) da las VFF è raschunaivel dal
puntg da vista sinergetic. La regenza ha approvà 270'000 francs per
quest project d'integraziun. Ils custs totals muntan a var 1,5 milliuns
francs. 82 pertschient da quels surpiglia la confederaziun.
Cars pli lungs sin las vias dal Grischun
Dapi il december 2002 dastgan circular en Svizra cars fin ad ina
lunghezza maximala da 15 meters (fin ussa 12 meters). La regenza ha ussa
fixà la lunghezza maximala per divers trajects da la via chantunala:
- Cuira-Lai-Casti: 12 meters
- via d'Alpsur, Sedrun-culm dal pass: 12 meters
- pass dal Flüela, Tavau-Susch: 12 meters
- via da Samignun, Vinadi-Acla da Fans: 10 meters
- pass da l'Umbrail, Sta.Maria V.M.-cunfin svizzer: 10 meters
Da vischnancas e regiuns
- Las revisiuns parzialas da las planisaziuns localas da Lantsch
(lescha da construcziun, plan da zonas e plan general da furmaziun) e da
Flem (lescha da construcziun, plan da zonas territori da construcziun ed
ulteriur territori communal, plan general da furmaziun "Sontga Clau" e
"Muletg" sco er il plan general d'avertura plan da sendas e vias
territori da construcziun, traffic e turissem, provediment) èn suenter
las decisiuns da las radunanzas communalas da l'october 2002 resp.
settember 2002 ussa er vegnidas approvadas da la regenza.
- Il project per in nov access nà da la Schellenbergstrasse a la
scola-dimora da Cuira a Masans è da princip vegnì approvà da la regenza.
Contribuziuns chantunalas a differentas instituziuns
- Dal fond da sport-toto ha la regenza approvà var 8500 francs a
favur dal club da skis Puntraschigna, da la basa ski alpin Engiadin'ota,
dal club da skis e da snowboard Mustér e dal club da tennis Razén.
- Per diversas ovras ed occurrenzas culturalas ha la regenza
deliberà contribuziuns e garanzias da deficit da totalmain 136'000
francs.
Projects da vias
- Per lavurs da cuvrida vi da la punt da Tardis (access Landquart
vest) sco er per l'installaziun tecnica cunzunt vi dals tunnels Traversa
e Rofla (A13) ha la regenza approvà en tut var 1,7 milliuns francs.
Chanzlia chantunala dal Grischun
Gremi: Regenza
Funtauna: rg chanzlia chantunala dal Grischun