La regenza grischuna è s'occupada cun il sboz da la lescha federala
davart l'imposiziun da taglia da participaziuns da collavuraturs ed ha
sustegnì da princip la direcziun da partenza dal project. Cun quest
project vegn mintga gudogn che deriva da participaziuns da
collavuraturas e collavuraturs a l'interpresa suttamess a la taglia. La
regenza metta grond pais a l'egualitad giuridica d'interpresas quotadas
e betg quotadas, a la cumpatibilitad internaziunala sco er a la
praticabilitad da la vart dal patrun e da las autoritads da taglia.
Perquai dumonda ella areguard las opziuns da participaziuns da
collavuraturs ina imposiziun da taglia consequenta al mument da la
vendita e betg, sco quai che l'administraziun da taglia aveva proponì,
al mument da l'acquist definitiv da dretg. Ultra da quai ha confermà la
regenza che dal pricip da l'exemziun da taglia na sa laschian deducir en
naginas manieras levgiaments da taglias sin gudogns che derivan da
participaziuns da collavuraturs.
Da vischnancas e regiuns
- La regenza ha approvà definitivamain il schlargiament e la
sanaziun da la scola primara da Salouf ed ha garantì a la vischnanca ina
contribuziun da construcziun da ca. 730'000 francs.
- Suenter las malauras dal november 2002 duain las vias da guaud
"Ritta", Tschamiu" e "Seglias" da la vischnanca da Suraua puspè vegnir
reparadas.
- La regenza ha approvà il project da reparatura e concedì ina
contribuziun chantunala da ca. 200'000 francs. En il medem mument ha
ella incumbensà l'uffizi da construcziun bassa dal Grischun d'elavurar
in project per la dustanza Chleirüfe sin il territori da la vischnanca
da Trimmis.
- La regenza ha approvà la revisiun parziala da la planisaziun
locala d'Alvagni (lescha da construcziun) da Valendau (lescha da
construcziun) e da Ftan (lescha da construcziun, plan da zonas, plan da
zonas e plan general da furmaziun "Chanscharoulas", plan general
d'avertura).
Contribuziuns chantunalas a differentas instituziuns
- Per otg open airs durant l'onn current ha la regenza approvà ina
garanzia da deficit da totalmain 16'000 francs.
- Per la construcziun fitg urgenta d'in segund sutpassadi per
persunas VR/VFF e per la construcziun nova da l'edifizi da la staziun da
Landquart ha la regenza approvà en il rom da duas cunvegnas d'agid
d'investiziun a la Viafier retica ina summa totala da ca. 1,7 milliuns
francs. La confederaziun surpiglia ina summa totala da ca. 7,5 milliuns
francs.
- La fundaziun Giuvaulta, center per pedagogia speziala a Giuvaulta,
survegn per l'acquisiziun cumpensatoria d'in bus da scola ina
contribuziun chantunala da ca. 17'000 francs. Ils custs totals muntan a
var 58'000 francs.
- Per lavurs d'inventarisaziun durant l'onn 2003 survegn l'archiv
cultural da l'Engiadin'ota in sustegn da 23'000 francs.
Persunal
- Erich Buchmann da Haldenstein sco er Hans Martin Meuli e Karl
Locher da Cuira èn vegnids elegids sco schef revisur resp. revisur e
represchentant dal schef revisur resp. sco revisur cun incumbensas
spezialas da l'administraziun da taglia dal Grischun.
- Mario Sasso da Cuira è vegnì elegì sco nov manader dal project
"GRiforma" en il secretariat dal departament da finanzas e militar dal
Grischun.
chanzlia chantunala dal Grischun
Gremi: Regenza
Funtauna: rg chanzlia chantunala dal Grischun