La regenza ha fixà ils custs normads e la tariffa da contribuziun
per la tgira d'uffants cumplementara a la famiglia per l'onn 2005. La
tariffa dals custs normads (custs da persunal, da locals, d'indrizs e
d'administraziun) per ura da tgira ed uffant importa l'onn 2005 8,45
francs tar maximalmain var 675'000 uras da tgira. Qua tras resultan
expensas totalas da var 5,7 milliuns francs. Da quai surpiglia il
chantun 15 pertschient u var 860'000 francs.
Consultaziuns a la confederaziun
- Administraziun federala da taglia - lescha federala davart la
taglia sin la plivalur: Sin plaun federal vegn examinà, sch'i duai
vegnir stgaffida la pussaivladad per tschertas interpresas da pudair far
giu quint cun la taglia sin la plivalur annualmain empè da mintga
quartal. La finamira da la midada da ritmus duain esser facilitaziuns
administrativas per interpresas pitschnas e mesaunas. La regenza
grischuna pudess s'imaginar ina midada ad ina perioda da rendaquint
annuala. Ella propona però sco alternativa in rendaquint cun in ritmus
d'in mez onn. Tenor l'opiniun da la regenza sto - independentamain da la
dumonda dal ritmus da rendaquint - mintga revisiun da la legislaziun
davart la taglia sin la plivalur esser caracterisada da l'intenziun da
simplifitgar tala.
Da vischnancas e regiuns
- Puschlav: La regenza ha approvà il project per in prà da giugar
tar il stabiliment da scola d'Annunziata ed ha approvà ina contribuziun
chantunala da circa 38'000 francs.
- Stussavgia: Per construir il stabiliment dal provediment d'aua e
d'idrants da l'associaziun da provediment d'aua da Bäch / Stussavgia èn
vegnids approvads totalmain circa 400'000 francs.
- Suraua: La vischnanca ha zavrà zonas da protecziun detagliadas per
il territori da funtaunas "Plaun da Schlondas". La regenza ha approvà il
plan da las zonas da protecziun.
- Cuira: La terza fasa da l'engrondiment da la chasa da scola
"Lachen" è vegnida approvada. La contribuziun chantunala importa circa
155 000 francs.
Contribuziuns chantunalas a differentas instituziuns
- Sport en la ARGE Alp: Per in tunier da hockey sin glatsch ed in
turnier da ballape da la cuminanza da lavur da las regiuns alpinas ARGE
Alp ad Uzwil ed a Bregenz/Vorarlberg ha la regenza approvà ina
contribuziun da totalmain circa 13'000 francs.
- Societad per la perscrutaziun da la cultura grischuna: La regenza
ha approvà la 2. ediziun da la versiun tudestga dal "manual d'istorgia
grischuna". La societad survegn l'incumbensa da realisar la concurrenza
ch'è necessaria per la stampa.
- "Mais im Bundeshuus - le génie helvétique": Quest film documentar
mussa la lavur dal parlament tar l'elavuraziun d'ina lescha. "Mais im
Bundeshuus" ha survegnì l'onn 2004 a Soloturn il premi da film svizzer
per il meglier film documentar.
Il film documentar è ina contribuziun bainvisa per l'instrucziun civica
pratica sin il stgalim superiur. Per quai duai ussa vegnir producì in
DVD da quel film documentar cun dumondas e repostas en differentas
linguas davart ils mecanissems democratics preschentads. La regenza
sustegna quest project cun ina contribuziun da 10'000 francs.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun