La regenza ha suttamess la revisiun parziala da la "lescha davart ils fatgs da sanadad dal chantun Grischun", da l'uschenumnada "lescha da sanadad", a la consultaziun. Il sboz resguarda er in scumond da postar reclamas da tubac sin fund public u sin fund privat, dal qual ins ha invista da fund public. Plinavant vegn creada da nov ina basa legala per confinanziar projects en il sectur da la prevenziun da la sanadad. Il sboz da la lescha resguarda la finala la renconuschientscha vicendaivla da diploms tranter la Svizra e l'uniun europeica. La consultaziun dura fin il schaner 2005. Ils documents da consultaziun pon vegnir consultads sut www.jpsd.gr.ch.

Artitgel da basa davart la furmaziun: Il Grischun sustegna l'armonisaziun dals sistems chantunals da furmaziun
La cumissiun per scienza, educaziun e cultura dal cussegl naziunal propona ina revisiun dals artitgels 62 fin 67 da la constituziun federala, ils quals sa refereschan a la furmaziun, ed uschia ina renovaziun da la constituziun da furmaziun. Las novaziuns las pli impurtantas en quest connex prevesan tranter auter che la confederaziun ed ils chantuns s'obligeschian expressivamain da coordinar e collavurar sin l'entir champ da furmaziun sco er che trais valurs da referenza vegnian regladas en moda unitara en l'entira Svizra: la durada dals stgalims da furmaziun, il passadi d'in stgalim a l'auter e la renconuschientscha da diploms. Per quai propona la cumissiun duas alternativas: ina cumpetenza federala subsidiara per cas ch'i na dess naginas regulaziuns sin la via da la coordinaziun ed ina cumpetenza federala senza cundiziuns.

La regenza grischuna sustegna la proposta da rinforzar la coordinaziun e la collavuraziun tranter la confederaziun ed ils chantuns e s'engascha per che la cumpetenza da la confederaziun vegnia reglada en moda subsidiara. En il model da basa statuescha questa regulaziun ina responsabladad primara dals chantuns per coordinar ils sistems da scola chantunals. Sut tge premissas che la cumpetenza da regulaziun da la confederaziun mussass in effect, stoppia anc vegnir preschentà pli cleramain, scriva la regenza en sia consultaziun per mauns da la cumissiun.

Las tariffas per las chasas da tgira 2005 èn fixadas
La regenza ha fixà las tariffas maximalas per abitantas ed abitants da chasas da tgira per l'onn 2005. Las novas tariffas importan tut tenor il stgalim da tgira tranter 120 francs e 190 francs per di da tgira ed abitant. Questas tariffas valan per quellas chasas da tgira che vegnan sustegnidas dal chantun cun contribuziuns.

Stgalim superiur da la scola populara: L'ordinaziun d'admissiun è revedida
La regenza ha approvà la revisiun parziala da la "ordinaziun davart la procedura d'admissiun al stgalim superiur da la scola populara", da l'uschenumnada "ordinaziun d'admissiun". La revisiun è resultada stringentamain pervi da novas regulaziuns da lescha sin il stgalim superiur da la scola populara, numnadamain pervi da la lescha da scola da l'onn 2000. La nova ordinaziun entra en vigur la mesadad d'october 2004.

Nov med d'instrucziun per istorgia
Las 6. classas primaras ed il stgalim superiur da las scolas talianas survegnan in nov med d'instrucziun d'istorgia "Storia della Svizzera" che vegn gia duvrà en il Tessin. Per elavurar ed edir in carnet accumpagnant per las scolaras e per ils scolars cun temas d'istorgia che pertutgan spezialmain il Grischun sco er per producir in DVD correspundent per las persunas d'instrucziun ha la regenza approvà ca. 100'000 francs.

Votaziun dal pievel: Nagins projects da lescha chantunals ils 28 da november
Per la votaziun dal pievel dals 28 da november n'èn previs nagins projects da lescha chantunals. I vegn dentant votà davart trais projects federals:
- il conclus federal dals 3 d'october 2003 davart la refurma da la gulivaziun da finanzas e da la repartiziun da las incumbensas tranter la confederaziun ed ils chantuns (RFI);
- il conclus federal dals 19 da mars 2004 davart in nov urden da finanzas e
- la lescha federala dals 19 da december 2003 davart la perscrutaziun da cellas embrionalas da basa (lescha davart las cellas da basa, LCB).

Da vischnancas e regiuns
- Corporaziun da vischnancas Surselva: La regenza ha approvà il concept da svilup 2. Las prioritads tematicas dal concept èn vegnidas messas sin la promoziun da l'economia resp. sin il turissem, sin la furmaziun, sin la reorganisaziun da l'organisaziun regiunala, sin il traffic, sin l'energia e sin la telematica.
- Purtagn: La revisiun da la lescha communala da taglia è vegnida approvada e po entrar immediatamain en vigur.

Contribuziuns chantunalas a differentas instituziuns
- Uniun archimob: L'exposiziun ambulanta "L'histoire c'est moi. 555 versiuns uffizialas da l'istorgia svizra 1939 - 1945" vegn cumplettada cun ina versiun taliana. Per quest intent ha la regenza approvà in credit da 10'000 francs. L'exposiziun vegn mussada la stad 2005 en il museum retic.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun