En connex cun la finanziaziun restanta da la cassa da pensiun
chantunala surpiglian las vischnancas grischunas ina part da circa 100
milliuns francs. Numerusas vischnancas cun ina pitschna forza finanziala
vegnan però engrevgiadas latiers en moda extraordinaria. Per questas
vischnancas ha la regenza concludì ina cumpensaziun speziala da
l'inegualitad da totalmain circa sis milliuns francs. Sche la summa per
la finanziaziun restanta da la cassa da pensiun chantunala surpassa 50
pertschient da quellas entradas da la vischnanca ch'èn decisivas per
eruir la forza finanziala communala, profitescha la vischnanca da la
cumpensaziun speziala da l'inegualitad. 99 pertschient da quellas
vischnancas sa chattan en la gruppa da forza finanziala quatter e
tschintg.
Ils sis milliuns francs per la cumpensaziun da l'inegualitad èn
cuntegnids en il preventiv 2005. Els duain vegnir pajads - sche
pussaivel - gia il mars 2005.
La regenza reveda las directivas ed ils reglaments en
il sectur da stipendis
La regenza ha approvà la revisiun totala da las "directivas per il
pajament da stipendis". Las dumondas per stipendis ston da nov vegnir
inoltradas mintg'onn aifer in mais suenter che l'onn da scola resp. da
scolaziun ha cumenzà. Nov è er che per tut las studentas e per tut ils
students da scolas autas professiunalas e da scolas spezialisadas
superiuras - independentamain dal sectur spezial - vala il medem import
maximal per meds d'instrucziun, per material da scola e per taxas. Abolì
è er vegnì il tractament inegual d'enfin uss en connex cun conceder
stipendis per curs da furmaziun supplementara linguistica da tschertas
gruppas professiunalas. Il medem mument è er vegnì revedì parzialmain il
"reglament per ils stipendis per la scolaziun professiunala e
supplementara".
Domadus relaschs revedids entran en vigur - cun excepziun da la
disposiziun per conceder stipendis per curs da furmaziun supplementara
linguistica - retroactivamain per il cumenzament da l'onn da scola
2004/2005.
Consultaziuns a la confederaziun
- Departament federal per ambient, traffic, energia e communicaziun
- midada da l'ordinaziun tecnica davart ils ruments (OTR): Ruments
manizzads betg metallics sco ch'els resultan da l'explotaziun da
vehichels vegls e d'auters apparats da metal, duain en il futur vegnir
dismess en moda centrala. Per quai vul ina fundaziun construir in
implant spezial. Per pudair finanziar il manaschi stuessan las circa
50'000 tonnas da rument manizzà betg metallic da la Svizra vegnir
elavuradas qua e mo qua. Per quai è necessaria in'adattaziun da la OTR.
La regenza sustegna cun dumondas e propostas l'adattaziun proponida da
la OTR.
Da vischnancas e regiuns
- Samedan: Per revitalisar la zona umida da Cristansains survegn la
vischnanca ina contribuziun chantunala da maximalmain 76'000 francs. La
confederaziun surpiglia circa 400'000 francs. La revitalisaziun da
questa zona umida è l'ultima etappa dal project per spustar il Flaz e
per augmentar la valur ecologica dal chanal da l'En.
- Cazas: Per la construcziun nova planisada d'ina halla da sport cun
in tschaler da lutga per il club da lutga da la Mantogna ha la regenza
garantì ina contribuziun chantunala da maximalmain 100'000 francs. Ils
custs totals muntan a circa in milliun francs.
Contribuziuns chantunalas a differentas instituziuns
- Promoziun da la cultura: Var 180'000 francs ha la regenza concedì
sco contribuziuns per totalmain 15 ovras ed occurrenzas culturalas.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun