La regenza ha deliberà la missiva tar la revisiun parziala da la lescha davart la banca chantunala grischuna. Il cussegl grond vegn a discutar il project en sia sessiun da favrer 2005.

En emprima lingia sa tracti da dar a la banca la libertad d'agir necessaria per restituir - sut tschertas cundiziuns e cun in tractament egual da tut las proprietarias e da tut ils proprietaris da la banca - chapital da dotaziun al chantun; per quest intent ston ils agens meds cuntanscher e mantegnair a lunga vista ina tscherta summa. Il medem mument vegnan fixadas las reglas per in eventual augment da l'agen chapital. Ina restituziun da chapital al chantun fiss insumma l'emprima en l'istorgia da la BCG.

Precisada vegn plinavant la collavuraziun tranter il cussegl grond, la regenza e la BCG. Il cussegl grond concluda vinavant la summa maximala dal chapital da dotaziun. La regenza fixescha - sin proposta da la BCG - las transchas da restituziun resp. d'augment; per quai sto il cussegl grond puspè approvar il preventiv.

Las disposiziuns executivas tar la nova finanziaziun dals ospitals èn avant maun
Suenter ch'il cussegl grond ha discutà en la sessiun d'avust la revisiun parziala da la lescha per promover la tgira da malsauns, ha la regenza deliberà uss las disposiziuns executivas correspundentas per la consultaziun. La finamira principala da la revisiun da la lescha è stada quella da passar da la finanziaziun da deficit vertenta ad ina finanziaziun dals ospitals orientada a las prestaziuns. La consultaziun tar las novas disposiziuns executivas dura fin ils 22 da november 2004.

La nova lescha per promover la tgira da malsauns e las disposiziuns executivas entran en vigur ensemen. Ils documents da consultaziun pon vegnir consultads en l'internet sut www.jpsd.gr.ch.

La nova lescha per il svilup economic entra en vigur il 1. da november
La regenza ha mess en vigur la nova lescha per promover il svilup economic en il chantun Grischun LSE per il 1. da november 2004. La nova ordinaziun cun las disposiziuns executivas entra en vigur ensemen cun la lescha. L'ordinaziun per promover l'economia publica en il chantun Grischun vertenta è vegnida abolida. La nova LSE è vegnida acceptada en la votaziun dal pievel dals 26 da settember 2004.

Las prestaziuns supplementaras chantunalas vegnan augmentadas l'onn 2005 per 1,5 pertschient
Las prestaziuns supplementaras PS vegnan augmentadas il 1. da schaner 2005 en il chantun Grischun per 1,5 pertschient. La contribuziun chantunala da PS s'augmenta pia per persunas che vivan sulettas per 250 francs, per conjugals per 380 francs e per orfens per 130 francs l'onn. Las PS servan a garantir ils bains necessaris per viver.

Consultaziuns a la confederaziun
- Uffizi federal da sanitad - revisiuns parzialas en l'assicuranza da malsauns: La regenza va d'accord cun las midadas proponidas en l'ordinaziun davart l'assicuranza da malsauns ed en l'ordinaziun davart la cumpensaziun da las ristgas en l'assicuranza da malsauns. I sa tracta qua per il pli d'adattaziuns tecnicas e da dretg processual. La regenza vul dentant avair sclerì che - tar midada da domicil - premias betg pajablas e participaziuns als custs na ston betg vegnir surpigliadas da la nova vischnanca. Quellas sto pajar l'anteriura vischnanca da domicil.
- Uffizi federal da las assicuranzas socialas - proceduras AI: La regenza sustegna l'optimaziun da las proceduras AI. Concretamain duai vegnir simplifitgada la procedura formala per fixar, eliminar u midar prestaziuns da la AI, e quai uschia sco ch'igl era il cas avant l'introducziun da la lescha federala davart la part generala dal dretg d'assicuranza sociala; per quest intent vegn substituida la procedura da protesta cun l'uschenumnada procedura da decisiun preliminara. Ultra da quai duai vegnir introducida in'obligaziun moderada da surpigliar ils custs tant davant la dretgira chantunala sco er davant il tribunal federal d'assicuranzas TFA e finalmain duai il TFA decider - en proceduras AI - mo pli davart dumondas giuridicas e na duai betg pli examinar las constataziuns davart ils fatgs ch'èn vegnidas procuradas da l'instanza precedenta. Questas mesiras duain reducir tut en tut il dumber dals recurs. Tschertas parts da la 5avla revisiun da la AI vegnan tractadas dal parlament sco project independent; la nova regulaziun da las proceduras AI tutga latiers.
- Institut federal da la proprietad intellectuala - revisiun da la lescha davart las patentas: La regenza refusa il sboz da la lescha en questa furma. Quest project indeblescha la protecziun da las patentas e pia la Svizra sco lieu da perscrutaziun empè da rinforzar sia abilitad innovativa e sia cumpetitivitad. Quai è gia la segunda consultaziun davart la revisiun da la lescha davart las patentas, tar la quala i sa tracta en emprima lingia da la patentaziun d'invenziuns biotecnologicas. En cumparegliaziun cun l'emprim project da consultaziun èn tranter auter vegnidas fatgas las suandantas midadas che vegnan refusadas dal Grischun: ina restricziun da la protecziun da las substanzas per gens e per sequenzas parzialas da gens sco er l'introducziun unilaterala d'ina obligaziun d'inditgar la funtauna da la resursa genetica, la creaziun d'in tribunal federal da patentas ed ina regulaziun unitara per advocats ed advocats da patenta. L'emprim sboz da la lescha davart las patentas da l'onn 2002 è anc vegnì sustegnì da la regenza grischuna.

Da vischnancas e regiuns
- Tarasp: La regenza ha approvà la nova constituziun communala. Tranter auter èn vegnidas revedidas las disposiziuns concernent la perioda d'uffizi (da nov trais empè da dus onns), il termin da las elecziuns (da nov october empè da november) e la procedura electorala (averta empè da per scrutini) da las autoritads communalas.

Projects da vias
- Tunnel da la Gotschna, Rofla e Traversa: Per las novas chaschas d'alarm SOS ha la regenza approvà totalmain var in mez milliun francs.

Chaussas persunalas
- Albert Fausch (1956), Cuira, è vegnì elegì da la regenza sco nov procuratur per giuvenils da la procura publica dal Grischun. El cumenza sia plazza il cumenzament da matg 2005. Fausch lavura actualmain sco inquisitur tar l'uffizi d'inquisiziun da Cuira.
- Orlando Nigg, Cuira, è vegnì elegì per il 1. da schaner 2005 sco collavuratur giuridic tar il departament da construcziun, traffic e selvicultura.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun