La regenza ha tramess en la consultaziun la nova lescha davart las
advocatas ed ils advocats. Las disposiziuns chantunalas actualas davart
la lavur da las advocatas e dals advocats en il Grischun èn
sparpagliadas en plirs relaschs. Perquai che la nova lescha chantunala
davart las advocatas ed ils advocats po sa basar sin la "lescha federala
davart la libra circulaziun da las advocatas e dals advocats" da l'onn
2002, èn ultra da quai daventadas obsoletas singulas disposiziuns
chantunalas. La lescha federala regla d'ina vart la libra circulaziun da
las advocatas e dals advocats e fixescha da l'autra vart ils princips
per lavurar sco advocata u advocat en Svizra.
La consultaziun dura fin la fin da schaner 2005. Ils documents da
consultaziun pon vegnir consultads sut
www.jpsd.gr.ch.
In territori da viticultura unifitgà tranter Panaduz e Fläsch
Ils dus territoris da viticultura tranter Fläsch e Malans sco er
tranter Igis e Panaduz vegnan fusiunads ad ina regiun da producziun
unifitgada. Perquai che la denominaziun d'origin controllada sto vegnir
introducida il pli tard per l'onn 2008 er en la viticultura, rinforza la
fusiun dals dus territoris da viticultura vertents la commerzialisaziun
dals vins or dal Signuradi e da la Val dal Rain. L'entira surfatscha da
vignas tranter Fläsch e Panaduz mesira 400 ha; da quellas sa chattan var
80 pertschient en il Signuradi.
Sin proposta da l'uniun grischuna da viticulturalas ha la regenza
approvà las adattaziuns correspundentas da las disposiziuns executivas
tar la "ordinaziun davart la viticultura e l'import da vin (ordinaziun
davart il vin)". La disposiziun revedida entra en vigur retroactivamain
per il 1. d'october.
Da vischnancas e regiuns
- Puschlav: Per la midada da construcziun da la chasa da dimora
"L'Incontro Poschiavo" ha la regenza approvà ina contribuziun chantunala
da maximalmain 1,5 milliuns francs.
- Landquart: La regenza ha approvà definitivamain il project da
construcziun per il schlargiament da la scola primara 2 ed ha garantì
per quai ina contribuziun da construcziun da ca. 120'000 francs.
Contribuziuns chantunalas a differentas instituziuns
- Agid umanitar: La regenza ha approvà per quai 14'000 francs. Las
contribuziuns singulas van a la helvetas, l'assoziaziun svizra per la
cooperaziun internaziunala, per in project da scolaziun en la Republica
Dominicana, a vétérinaires sans frontières per in project da cumbat
cunter la frenesia en Georgia sco er a las organisaziuns d'agid umans
per umans per in project d'infrastructura da scola en Etiopia e paun per
tuts per in project d'agricultura en Peru.
- Uniun grischuna d'art La regenza ha concedì a l'exposiziun en il
museum d'art dal Grischun "Matias Spescha - per ils otganta" ina
contribuziun da 15'000 francs. En connex cun l'exposiziun la primavaira
proxima cumpara era ina publicaziun.
Projects da vias
- Tunnel dal San Bernardin: Per stabiliments electromecanics en il
rom da la sanaziun dal tunnel ha la regenza approvà ca. 550'000 francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun