Il Grischun vegn a gidar a purtar il project d'internet "guichet
virtuel" er ils proxims dus onns. La regenza ha sutsegnà la cunvegna
correspundenta cun la confederaziun. Il guichet virtuel è il spurtegl
online www.ch.ch che collia tras tscherts chavazzins - l'uschenumnà
"princip da situaziuns realas" - las infurmaziuns correspundentas da las
paginas d'internet da la confederaziun, dals chantuns e da las
vischnancas.
La nova cunvegna ha la finamira centrala da manar il project en la
fasa da manaschi per propi. La prioritad duai esser da metter a
disposiziun las infurmaziuns gistas e betg pli d'amplifitgar www.ch.ch
fin ad in portal cumplessiv da prestaziuns da servetsch online; per
quest intent basegni tschertas tecnologias specificas. La regenza
grischuna metta dentant en evidenza ch'ella spetga anc adina che la
confederaziun surpiglia la direcziun dal svilup da questa basa tecnica,
dals uschenumnads "assistents da transacziun". Ultra da quai stoppia
www.ch.ch vegnir communitgà e propagà uss en moda intensiva per
augmentar ses grad d'enconuschientscha sin cifras acceptablas.
L'organisaziun dal servetsch da salvament vegn reglada da nov
per 2005
La regenza ha relaschà las disposiziuns executivas davart
l'organisaziun dal servetsch da salvament en il Grischun. Questas sa
basan sin il concept da salvament da 1999 e sin la lescha correspundenta
da 1997. Cun la revisiun parziala da la lescha per promover la tgira da
malsauns era vegnida stgaffida l'onn 1997 la basa per introducir il clom
d'agid sanitar 144 en il chantun Grischun. Las novas disposiziuns
executivas duain remplazzar a partir dal cumenzament da 2005 la
"ordinaziun davart il transport da pazients" da 1979 ch'era valaivla fin
uss.
Da vischnancas e regiuns
- Roten: Per la construcziun nova da la scolina survegn la
vischnanca ina contribuziun chantunala da var 190'000 francs. La regenza
ha approvà uss definitivamain il project da construcziun.
- Küblis: La regenza ha approvà la nova constituziun communala.
- Consorzi da scola "scola primara Lumnezia-dado": Las vischnancas
da Degen, Cumbel, Morissen, Vella e Vignogn èn s'unidas ad in consorzi
per manar las classas primaras. La regenza ha approvà il statut
d'organisaziun correspundent.
- Pro Partenz: La revisiun dals statuts da la corporaziun regiunala
è vegnida approvada. Da nov è vegnida prolungada tranter auter la
perioda d'uffizi da las commembras e dals commembers da la suprastanza,
da las cumissiuns permanentas e da la cumissiun da gestiun, e quai da
dus sin quatter onns.
Contribuziuns chantunalas a differentas instituziuns
- Occurrenzas da sport da naiv 2005: La regenza sustegna cun ina
contribuziun l'occurrenza da sport da naiv "La nuit blanche" dals 19 da
mars 2005 a Tavau. "La nuit blanche" è il final da la stagiun dal sport
da naiv svizzer. En quest connex vegnan undrads ils megliers sportists
da naiv svizzers da l'onn. Per il "Worldcup Final of Disabled Alpine &
Nordic Skiing Klosters 2005" è medemamain vegnida garantida ina
contribuziun chantunala; per domaduas occurrenzas totalmain 70'000
francs.
Projects da vias
- A 13 / via dal Partenz: Per indrizs electromecanics en il rom dals
projects "sanaziun dal tunnel dal San Bernardin", "guntgida da Claustra"
e "guntgida da Saas" ha la regenza approvà totalmain var quatter
milliuns francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun