Il program da distgargia 2004 da la confederaziun è inevitabel e vegn sustegnì per gronda part dal chantun Grischun. La regenza grischuna insista però sin adattaziuns sistematicas. Problematic, gea betg acceptabel è il program da distgargia là, nua ch'el maina ad indossaments da las grevezzas als chantuns: en il sectur d'asil e da fugitivs, tar l'eliminaziun da la part extraordinaria dal chantun a la taglia sin il petroli e tar la reducziun individuala da las premias. La regenza grischuna na vul betg acceptar questas reducziuns, perquai ch'ellas succedan per part en secturs ch'èn effectivamain incumbensas federalas e perquai ch'ils chantuns ston pajar ils custs che resultan supplementarmain, sco en il sectur d'asil e da fugitivs. Las reducziuns pertutgan ultra da quai secturs, en ils quals ils chantuns n'han praticamain nagina libertad d'agir, uschia en il traffic regiunal public.

Plinavant constatescha la regenza che la situaziun da partenza dals chantuns per la refurma da la gulivaziun da finanzas e da la repartiziun da las incumbensas tranter la confederaziun ed ils chantuns RFI vegn pegiurada tras il program da distgargia 04. La finala tutga il program da distgargia 04 surtut era secturs ch'èn gia vegnids tangads fermamain tras il program da distgargia 03.

Problematic è main il volumen dal program da distgargia 04 en tut che la moda da las mesiras e da lur effect da repartiziun sin ils chantuns. Ils chantuns vegnan tutgads en moda fitg differenta dal il program da distgargia, il pli ferm vegnan tutgads ils chantuns perifers ed ils chantuns da muntogna, scriva la regenza en sia posiziun al cusseglier federal Hans-Rudolf Merz.

Il program da distgargia 04 quinta principalmain cun reducziuns da las expensas da 1,5 milliardas francs. En tut duai il budget federal vegnir distgargià fin 2008 per duas milliardas francs.

L'inscripziun dal "code 178" en il document dal vehichel daventa taxabla
Firmas e persunas privatas pon ordinar cun ina inscripziun en il document dal vehichel ch'el na po betg vegnir annulà u transferì ad in auter possessur - danor sch'ellas permettan quai. L'inscripziun dal "code 178" en il document dal vehichel daventa adina pli populara. Correspundentamain auts èn daventads ils custs administrativs da l'uffizi per il traffic sin via per l'examinaziun e per l'archivaziun dallas dumondas, tranter il 2002 ed il 2003 èn quellas s'augmentadas per 100 pertschient a 1500.

Questa prestaziun da servetsch daventa perquai da nov taxabla e custa 50 francs. La regenza ha decidì la revisiun correspundenta da la "ordinaziun per incassar taxas e custs dals possessurs da vehichels a motor e da velos en il chantun Grischun". Questa midada entra en vigur il schaner 2005.

La regenza fixescha las contribuziuns da gestiun 2005 dal chantun a las instituziuns da persunas impedidas Decisiva per l'autezza maximala da las contribuziuns da gestiun dal chantun a las instituziuns renconuschidas per l'integraziun professiunala e sociala da creschids impedids è er sco gia l'onn 2004 la media dals deficits da gestiun dals onns 2001 e 2002 plus trais pertschient da la chareschia. Perquai ch'i n'è da registrar praticamain nagina chareschia, resguarda la regenza quai sco giustifitgabel da laschar la contribuziun dal chantun sin il medem nivel sco il 2004. En tut importan las contribuziuns chantunalas a las instituziuns da persunas impedidas per l'onn 2005 var 3,7 milliuns francs.

Cun il program da distgargia 2003 ha la confederaziun scursanì las contribuziuns ad instituziuns da persunas impedidas. Quellas na pon betg vegnir cumpensadas cumplettamain dal chantun. La confederaziun prevesa da limitar las contribuziuns federalas 2005 sin la basa da las contribuziuns 2000 plus in supplement da chareschia da 4,5 pertschient.

Ulteriuras consultaziuns
- Conferenza dals directurs chantunals da finanzas dal martgà da lottaria e da la lescha da lottaria - cunvegna interchantunala davart la surveglianza sco er davart la permissiun e l'utilisaziun dal retgav da lottarias e scumessas che vegnan manadas tras interchantunalmain u naziunalmain. La regenza grischuna era s'exprimida criticamain tar il sboz da la confederaziun davart la lescha da lottaria, la proposta da la conferenza dals directurs chantunals da finanzas chatta en vista a quest fatg en general buna accoglientscha. In pau nivlusas èn restadas tar quest sboz la realisaziun concreta e l'autezza dals custs e dals retgavs da las taxas. En general di la regenza grischuna dentant gea a las finamiras da fixar ina tariffa da la taglia a la funtauna standardisada e che vala per tut ils chantuns.
- Departament federal da giustia e polizia - Revisiun parziala dal cudesch civil svizzer (dretg real immobigliar e dretg dal register funsil): Questa revisiun parziala cumpiglia ca. 100 artitgels ed è la pli gronda dapi l'entrada en vigur dal cudesch civil svizzer. La novaziun la pli impurtanta è l'introducziun da la brev ipotecara registrada electronicamain empè da la brev ipotecara sin palpiri. La brev ipotecara registrada resulta tar la registraziun en il cudesch funsil. En quest connex na vegni betg pli emess in titel ipotecar; quai sbassa ils custs administrativs. Sco ulteriura novaziun è prevesida l'introducziun d'in uschenumnà "dretg da spazi" u "pitschna proprietad d'abitar", quai sco cumplettaziun da la proprietad en condomini u cumproprietad. Uschia vegniss stgaffida la pussaivladad d'utilisar e da renovar a l'intern mo ina tscherta part da l'edifzi. La regenza grischuna sustegna la proposta per l'introducziun da la brev ipotecara registrada electronicamain, refusa dentant l'idea dal "dretg da spazi" sco proposta pauc adattada per la pratica.

Da vischnancas e regiuns
- Maiavilla: La regenza ha approvà ils novs statuts da la vischnanca burgaisa. Quels prevesan tranter auter da nov il dretg da la radunanza da burgais d'approvar il preventiv resp. els prevesan l'incumbensa dal cussegl dals burgais da preschentar in preventiv. Ultra da quai è il "sustegn e la promoziun d'occurenzas culturalas, d'utilitad publica e sportivas" vegnì acceptà sco nova incumbensa da la vischnanca burgaisa.
- Surses: Per meglierar la collavuraziun tranter la "uniun d'interess turistic da las vischnancas dal Surses" e " Savognin turissem " vegn instituziunalisada ina conferenza da las suprastanzas. Ultra da quai vegn sbassda la contribuziun da las vischnancas per promover il turissem per totalmain 100'000 francs. Quellas ed autras mesiras èn cuntegnidas en il nov statut d'organisaziun da la "uniun d'interess turistic da las vischnancas dal Surses". La regenza ha approvà il nov statut d'organisaziun.
- Trimmis e Says: La regenza sustegna la fusiun da las duas vischnancas cun ina contribuziun da promoziun da 2,8 milliuns francs or dal fond da gulivaziun da finanzas, sche las duas vischnancas ed il cussegl grond approveschan la fusiun. Ella è da l'opiniun che la fusiun da Trimmis e Says è en l'interess dal chantun e da la refurma da las vischnancas che quel ha en mira.

Contribuziuns chantunalas a differentas instituziuns
- Almanacco Mesolcina-Calanca: La regenza ha approvà ina contribuziun da 6000 francs per l'ediziun dal chalender 2005.
- Claustra Son Jon a Müstair: La regenza ha approvà ina contribuziun da 10'000 francs per l'ediziun dal guid dal museum per il museum en la tur da Planta.
- Teater da la citad da Cuira: La regenza ha approva ina contribuziun chantunala da 190'000 francs per la stagiun 2004/2005.

Chaussas persunalas
- Hansjürg Bollhalder (1955), Cuira, è vegnì elegì sco schef da la controlla da finanzas CFI. Bollhalder era il suppleant dal schef da la CFI e dapi la stad 2004 il schef ad interim.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun