In nov element central da www.gr.ch è il spurtegl online integrà da las autoritads www.ch.ch. Quest access virtual tar l'administraziun chantunala porscha a las vischinas ed als vischins la pussaivladad da retrair tschertas infurmaziuns da las autoritads a maun d'in register da chavazzins u - tut tenor la purschida - da far diever da tut ils servetschs online. Il spurtegl online collia sur ils chavazzins "vita privata", "societad", "lavur", "sanadad", "segirezza sociala", "mobilitad", "segirezza", "stadi e politica" sco er "economia" las websites da las vischnancas grischunas e dals uffizis chantunals. Uschia na sto il vischin betg pli savair explicitamain tge autoritad ch'è cumpetenta per ses giavisch e co ch'el cuntanscha ella per internet: las adressas www.gr.ch u www.ch.ch bastan. En il Grischun èn passa 95 pertschient da las vischnancas e dals uffizis chantunals colliads sur lur atgnas websites cun il spurtegl online.
Il spurtegl online na porscha betg mo in access nov e pli simpel als servetschs ed a las infurmaziuns da las autoritads grischunas, mabain er a las autoritads da las ulteriuras vischnancas svizras, dals chantuns ed a l'administraziun federala. Il spurtegl online vegn, en collavuraziun cun la confederaziun, ils chantuns e las vischnancas, sviluppà cuntinuadamain ed amplifitgà areguard il cuntegn.

Parlament: prender invista publicamain en colliaziuns d'interess
La chanzlia chantunala ha schlargià anc ina giada la purschida d'infurmaziuns sin www.gr.ch er en il sectur "parlament": Davent dad ussa pon ins prender invista da las colliaziuns d'interess da las deputadas e dals deputads grischuns. Tenor l'artitgel 8 alinea 2 da l'urden da gestiun dal cussegl grond è il register da las activitads dals deputads public. Las colliaziuns d'interess da las deputadas e dals deputads grischuns èn accessiblas sur la glista da commembers dal parlament sin www.gr.ch. La glista da commembers cumpiglia ussa nov sper l'adressa postala er anc l'adressa dad e-mail da las commembras e dals commembers dal parlament ed ils nums da lur suppleantas e suppleants.
Ultra da quai èn vegnidas meglieradas las funcziunalitads per tschertgar chavazzins, il cuntegn d'infurmaziuns en il sectur "noss chantun" è vegnì schlargià ("products dal Grischun", maschinas da tschertgar per il Grischun) e la midada da linguas per ils cuntegns en tudestg, rumantsch e talian è vegnida simplifitgada.

Chanzlia chantunala: model directiv ussa en l'internet
www.gr.ch, il portal da l'administraziun chantunala dal Grischun è in servetsch da la chanzlia chantunala dal Grischun. Tge rolla gioga il post da stab dal parlament e da la regenza dentant uschiglio anc e co ademplescha el sia incumbensa? Dal model directiv cun las obligaziuns e finamiras da la chanzlia chantunala pon ins ussa prender invista en l'internet en trais linguas. Ultra da quai tradescha www.staka.gr.ch pertge che Picasso e la noziun "light" pon senz'auter star en connex cun la chanzlia chantunala dal Grischun.


Gremi: chanzlia chantunala dal Grischun
Funtauna: rg chanzlia chantunala dal Grischun