La sessiun da december 2004 vegninta vegn il cussegl grond a sa
fatschentar en il rom da la debatta dal preventiv cun la fixaziun da las
datas da basa ch'èn decisivas per las contribuziuns da gestiun 2005 dal
chantun als ospitals ed a prender plirs conclus en quel connex. La
cumissiun per sanadad e fatgs socials ha tractà intensivamain questa
tematica en duas sesidas. A chaschun da l'emprima sesida dals 9 da
november 2004 èn stads preschents - ultra dal cusseglier guvernativ
Martin Schmid e da represchentants da l'administraziun - er
represchentants da la federaziun chasas ed ospitals dal Grischun e da
l'uniun grischuna dals medis d'ospital.
L'incumbensa da la cumissiun è stada da predeliberar per il cussegl
grond las dumondas ch'èn vegnidas fatgas da la regenza per l'emprima
giada en quest connex ed en questa furma. La cumissiun ha per gronda
part surpiglià la lingia d'argumentaziun da la regenza e sustegna las
propostas concernent la rata d'ospitalisaziun, concernent il credit
global per il servetsch da salvament sco er concernent il credit global
per l'instrucziun e per la perscrutaziun. In grond consens han chattà -
suenter ina discussiun pli lunga - er las tariffas da las taxas
proponidas da la regenza per pazientas e pazients extrachantunals, per
pajadras e pajaders autonoms e per pazientas e pazients privats e mez
privats. La proposta concernent il credit global per ils servetschs da
pichet è vegnida assegnada senza ina gronda debatta.
Votums differents haja perencunter dà cun tractar las propostas
davart la fixaziun dals custs pro cas renconuschids standardisads. La
regenza vul fixar quels tar 7'320 francs pro cas. Qua ha cumenzà ina
discussiun da basa, quant enavant che las mesiras da spargn ch'il
cussegl grond ha concludì possian vegnir realisadas senza prender
resguard dals pertutgads directamain. Tenor l'opiniun da la maioritad da
la cumissiun na dastgan mesiras da spargn che na pon betg vegnir
realisadas betg vegnir cumpensadas uschia che las vischnancas vegnian
engrevgiadas supplementarmain da custs pro cas ch'èn correspundentamain
pli bass. Perquai è ella da l'avis ch'ins stoppia renunziar a la mesira
da spargn "aboliziun dal supplement dal martgà" en il sectur dals
ospitals ed uschia er a sia cumpensaziun en l'autezza da quatter
milliuns francs e d'acceptar perencunter in augment dals custs pro cas.
La cumissiun è conscienta da quest fatg e metta pais sin la constataziun
ch'ins stoppia l'emprim ramassar experientschas cun il nov sistem per
finanziar ils ospitals, avant che conclusiuns expressivas possian vegnir
tratgas.
Gremi: cumissiun per sanadad e fatgs socials
Funtauna: rg cumissiun per sanadad e fatgs socials