Clau Scherer sa numna il purtader da quest onn dal premi principal
dal fond cultural Eliette von Karajan. Ultra da quai vegnan surdads
tschintg premis da promoziun. Per la promoziun da giuvenils survegn la
filarmonia da chombra dal Grischun in premi spezial.
Las purtadras ed ils purtaders dals premis èn tuts giuvnas
dirigentas e giuvens dirigents. Il tema ch'è vegnì dà quest onn per il
premi dal fond Eliette von Karajan stat perquai fitg datiers a la
fundatura. Tuttina vegn la distribuziun dals premis 2004 probablamain ad
esser l'ultima. L'avegnir dal fond cultural Eliette von Karajan è dal
tuttafatg indecis.
Ultra dal premi principal a Clau Scherrer survegnan tschintg
ulteriuras artistas ed artists in premi da promoziun: Corina Barandun,
Manuela Bühler, Ruth Michael, Alexandra Peterelli e Ruth Soland. Per la
promoziun da la generaziun giuvna survegn la filarmonia da chombra dal
Grischun in premi spezial. Il premi principal è dotà cun 50'000 francs,
ils premis da promoziun èn dotads cun mintgmai 15'000 francs, ed il
premi spezial è dotà cun 20'000 francs.
Il premi principal
Clau Scherrer è naschì l'onn 1976 a Trun. Cun 6 onns survegn el sia
emprima instrucziun da clavazin tar Armin Caduff a la scola da musica
Surselva. Gia cun 12 onns surpiglia el la plazza d'organist a Schlans.
1992-1997 frequenta el il gimnasi da musica Feldkirch/Vorarlberg e
studegia clavazin tar prof. Ferenc Bognar al conservatori statal da
Vorarlberg. I suondan differents premis e differentas distincziuns,
tranter auter survegn el il premi da cultura dal chantun Grischun
(1989/Fargliuns Scherrer), il premi lions per giuvens musicists a la
scola da musica Surselva (1990), il premi CRR (1992), diversas
distincziuns sco partenari al clavazin tar la concurrenza federala
austriaca "Prima la Musica" en la valitaziun da solistas e solists
(1996) ed il premi da cultura da la vischnanca da Trun (2002).
Dapi l'onn 1998 correpetescha el regularmain al teater dal stadi da
Vorarlberg a Bregenz. Cun distincziun terminescha el l'onn 1999 il
diplom da concert sco er l'onn 2002 il diplom d'instrucziun e da
concert. Medemamain cun distincziun terminescha el ses studi da dirigent
da chor a l'academia da musica a Basilea.
Il giuven musicist po preschentar ina viva activitad da concerts e
da musica da chombra e diversas registraziuns da radio e da DC, p.ex.
cun l'Ensemble Plus a Bregenz. Sco dirigent e pianist lavura el tranter
auter cun ils suandants orchesters: la filarmonia da la Germania dal
sidvest a Constanza, l'orchester da sinfonia statal a Bregenz,
l'orchester baroc Capriccio a Basilea, la filarmonia da chombra dal
Grischun, il Collegium Musicum a Son Gagl, la filarmonia statala Oradea
(Rumenia).
Clau Scherrer fundescha l'onn 1999 il chor Cantus Firmus Surselva e
davent dal november 2004 surpiglia el l'enconuschent chor viril
Lumnezia. Il schaner 2005 vegn el probablamain ad avair la funcziun
d'assistent tar las producziuns d'opera en il teater statal a Bregenz.
Daspera instruescha el a la scola da musica da Domat ed a la scola da
musica Surselva.
Tschintg premis da promoziun
Corina Barandun è naschida l'onn 1968 a Filisur. Sper la scola
secundara cumenza ella sia instrucziun da clavazin. Durant il studi al
seminari da magisters ha ella la pussaivladad da cooperar al chor
facultativ ed al tschertgel da chant dal Grischun. Sper l'instrucziun da
clavazin frequenta ella ina instrucziun d'orgla e da musica ed è
commembra da l'ensembel vocal da la scola da musica HDH, sut la
direcziun da Luzius Hassler. Suenter studegia ella a l'academia per
musica da baselgia e musica da scola a Lucerna, nua ch'ella terminescha
en il rom principal chant e direcziun da chor.
Il cumenzament da l'onn 1990 cumenza ella sias emprimas direcziuns
musicalas tar differents chors, tranter auter tar il "Postmännerchor" da
Lucerna, tar il chor viril d'Egolzwil e tar il chor da baselgia da
Tusaun. Ella è la fundatura e dirigenta dal chor d'uffants da la scola
da musica Viamala. Sco commembra è ella activa en l'ensembel vocal
Cantaurora ed en la cumissiun da musica da la federaziun chantunala da
chant.
Manuela Bühler è naschida l'onn 1975 a Samedan. Durant tut il temp
da scola frequenta ella l'instrucziun d'accordeon e da ghitara a la
scola da musica Morell a San Murezzan. Il seminari da magisters a Cuira
terminesche ella cun ina scolaziun da clavazin e d'orgla da baselgia e
durant ils onns 1995-1997 frequenta ella ils curs da dirigent I e II tar
la federaziun chantunala da chant. Manuela Bühler profundescha ses studi
da musica al conservatori a Turitg. Ella terminescha cun la scolaziun da
dirigenta cun il diplom da dirigenta dal chor.
Durant ses temp da scola sa participescha ella a differentas
concurrenzas da musica Coupe Suisse de l'Accordeon. Sia emprima
activitad sco dirigenta cumenza ella tar il chor rumantsch dal seminari
e tar il quartet dubel. Sco magistra d'accordeon è ella engaschada en
pensum parzial durant 2 onns tar la scola da musica dal Grischun central
a Savognin e pli tard sco magistra da musica a la scola secundara da
Bischofszell. Daspera è ella dirigenta dal chor da dunnas da Pfungen
sper Winterthur.
Ultra da sia occupaziun sco manadra da la filiala da la fatschenta
da musica "Noten-Punkt" a Winterthur dirigia Manuela Bühler oz il chor
maschadà da Donat en Val Schons ed il chor maschadà da l'uniun grischuna
a Son Gagl. Daspera è ella presidenta dal chor Cantaurora da Cuira che
vegn dirigì da Peter Appenzeller.
Ruth Michael è naschida l'onn 1966 a Cuira. Ses studi da musica
cumenza ella cun ina instrucziun da violina a la scola da musica da
Cuira e cuntinuescha quel lura a Schaffusa ed a Turitg, nu ch'ella
cuntanscha il diplom d'instrucziun.
Oz instruescha ella violina a la scola da musica da Cuira e da
Landquart. Daspera s'occupa ella da la terapia da musica per uffants
fitg impedids en la chasa d'uffants "Therapeion" a Zizers sco er en il "
Schulheim Chur" e dat mintg'onn concerts ensemen cun persunas impedidas.
Ultra da quai è ella emprima violinista tar la "Orchestrina" a Cuira che
vegn dirigida da Heinz Girschweiler ed è dirigenta dal chor da baselgia
refurmà da Domat. Ruth Michael è activa en differentas furmaziuns da
musica da chombra, spezialmain dapi ca. 3 onns en il "Ensemble 2".
Alexandra Peterelli è naschida l'onn 1973 a Cuira. Suenter in onn
studi da la scienza da musica a l'universitad da Turitg cumenza ella
l'onn 1994 cun in studi da musica da 5 onns a l'acadiemia da musica da
Lucerna. Quel terminescha ella cun il diplom da musica da scola I ( rom
principal chant e direcziun da chor) e cun il diplom d'instrucziun per
chant da solistas e da solists.
Sia activitad sco dirigenta dal chor cumenza ella l'onn 1995 tar
differents chors p.ex. tar il chor maschadà da Masans, tar il chor
maschadà da Razén e tar il chor maschadà "Las Vouschs dalla Gelgia", nua
ch'ella è vicedirigenta. Ensemen cun ses bab fundescha ella il chor
d'uffants e giuvenils "Ridens" e surpiglia pli tard la direcziun da
quel. L'onn 1996 cumenza ella ad instruir en differentas scolas da
musica (Panaduz, Viamala e Grischun central) ed a la scola chantunala
grischuna, a la scol'auta professiunala da pedagogia e - sin basa
privata - chant per solistas e solists.
Dapi l'onn 2001 sa deditgescha Alexandra Peterelli a la furmaziun e
direcziun dal chor d'uffants e da giuvenils Surmeir. Daspera ha ella
fundà in ensembel, cun il qual ella ha tranter auter inscenà e dirigì la
part dal chant tar il teater da musica "Farm der Tiere" ch'è vegnì
preschentà la stad 2004 sco atgna producziun en il rom dal program da
giubileum "5 onns emnas da cultura en il chastè da Riom".
Ruth Soland è naschida l'onn 1966 en Engiadina. Gia sco uffant e sco
matta giuvna ha l'enorm progress en l'instrucziun da violina, clavazin e
chant demussà ses talent musical. Suenter ha ella fatg il studi da
musica (chant da solista, diriger e musica da scola II) a Winterthur ed
a Basel.
Ruth Soland è solista da chant, dirigenta, dirigenta dal chor e
magistra da gimnasi. Sco dirigenta dal chor lavur ella cun l'ensembel da
renum internaziunal Camerata da Berna, cun l'orchester da chambra La
Passione da Basilea, cun l'orchester da sinfonia da Turitg e cun il
quartet Amar. En la stagiun 2002/03 dirigia ella la gronda messa da
Mozart en C moll a Turitg, Baden ed a Bienna sco er il requiem da Gounod
a Baden.
L'onn 2004 sa preschenta ella a las emnas da festa da musica da
Baden, al festival Kultour ed a la Petite Messe Solenne da Rossini a
Baden. Ultra d'instruir musica a la scola chantunala da Zofingen è ella
gia dapi 7 onns manadra artisitica da l'orchester da chombra da Baden.
Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da
l'ambient