Las collavuraturas ed ils collavuraturs da l'administraziun chantunala e las persunas d'instrucziun da las scolas popularas survegnan a partir dal schaner 2005 in supplement da chareschia d'in pertschient. La chareschia importava la fin da november 1,5 pertschient. Il cussegl grond aveva concludì en connex cun la tractativa dal pachet da spargn 2003 da reducir la cumpensaziun da chareschia per ils onns 2004 e 2005 da princip per 0,5 pertschient. Perquai n'aveva il persunal chantunal survegnì l'onn 2004 - tar ina chareschia da 0,5 pertschient - nagina cumpensaziun da chareschia.

Controllas da seria dal medi da scola na datti betg pli
A partir dal cumenzament da l'onn da scola 2005/2006 na datti betg pli las controllas da seria dal medi da scola che avevan lieu trais giadas durant il temp da scola obligatori ed ina giada durant la scola professiunala e la scola media. La regenza ha concludì la revisiun totala respectiva da la "ordinaziun davart il servetsch medicinal da scola". Las controllas dals uffants e giuvenils - sco per exempel la controlla dal stadi da vaccinaziun - vegnan fatgas da nov da las medias e dals medis da chasa u da las medias e dals medis d'uffants, e quai mintgamai ina giada al cumenzament ed a la fin dal temp da scola. En il futur stattan las medias ed ils medis da scola da fin uss a disposiziun a las scolas en spezial per funcziuns da controlla e da cussegliaziun en il sectur da l'infurmaziun da scolaras e scolars, da geniturs e da persunas d'instrucziun sco er per projects da l'educaziun da sanadad e da la prevenziun.

Relaschs chantunals novs e revedids
- Nova ordinaziun: La regenza ha relaschà l'ordinaziun tar la "lescha davart lieus da scolaziun en ils fatgs da la sanadad e socials". Il settember 2002 ha il pievel grischun acceptà la lescha davart lieus da scolaziun en ils fatgs da la sanadad e socials LLSS.
- Disposiziuns executivas revedidas: La regenza ha approvà la revisiun totala da las "disposiziuns executivas davart la lescha per promover la tgira da malsauns" e la revisiun parziala da las "disposiziuns executivas per renconuscher organisaziuns da la tgira ed assistenza a chasa sco er da la cussegliaziun per mammas e babs". Il cussegl grond aveva concludì l'avust 2004 la revisiun parziala da la lescha per promover la tgira da malsauns.

Da vischnancas e regiuns
- Malans: Per la construcziun da la nova halla da sport ha la regenza garantì ina contribuziun da construcziun da maximalmain circa 840'000 francs. Il project preliminar è da princip vegnì approvà. Ils custs totals importan var 3,8 milliuns francs.
- Vischnanca da Tavau: La regenza ha garantì ina contribuziun chantunala d'in mez milliun per l'emprima etappa da la renovaziun dal stadion da glatsch da Tavau.
- Cunter: Per la construcziun da la nova fermada per il traffic public e d'in passape entaifer il vitg survegn la vischnanca ina contribuziun chantunala da circa 77'000 francs.
- Via da Val S. Pieder: Tranter Glion e Val S. Pieder pon - premess che la via na saja betg cuvrida cun naiv - circular da nov er camiuns a sella da 12 meters lunghezza.
- Via da Monstein: Tranter la via da la Landwasser fin al deposit da laina vegn augmentada da nov per circa 150 meters la limita maximala dal pais dals vehichels a 40 tonnas.

Contribuziuns chantunalas a differentas instituziuns
- Rait da cumpetenzas "aua en regiuns da muntogna": Il chantun Grischun sustegna il project fin l'onn 2007 cun circa 42'000 francs ad onn. "Aua en regiuns da muntogna" è im project da pilot da la conferenza da las regenzas dals chantuns alpins. La rait da cumpetenzas duai entretschar intenziunadamain enconuschientschas ed experientschas davart il tema "aua en regiuns da muntogna" e posiziunar uschia meglier las regiuns da muntogna en il rom da la nova politica regiunala da la confederaziun.
- Institut per turissem e temp liber (ITT): Fin l'onn 2007 survegn il ITT a Cuira 80'000 francs ad onn. Uschia vegn sustegnì spezialmain in project d'impuls per il svilup dal turissem en il Grischun.
- Forum economic dal Grischun: 80'000 francs ad onn survegn il forum economic dal Grischun fin l'onn 2007 spezialmain per ils projects "ambassadurs dal concept directiv per l'economia dal Grischun" ed "abitaziuns da vacanzas en il turissem grischun".
- Pro natura regione Bregaglia: Per l'exposiziun "storia del paesaggio di Maloggia/Malora" ha la regenza approvà ina contribuziun da 10'000 francs.
- Promoziun da la cultura: Var 450'000 francs ha la regenza concedì sco contribuziuns e sco garanzia da deficit per totalmain 19 ovras ed occurrenzas culturalas.

Projects da vias
- A13 Cuira nord-Zizers: La regenza giuditgescha il project per spustar il vial dal nord da l'autostrada A13 tranter Cuira nord e Zizers sco ecologicamain cumpatibel. Il project prevesa da manar il vial dal nord sin in traject da circa quatter kilometers parallellamain cun il vial dal sid. Il vial dal sid vegn il medem temp sanà ed i vegn construì in corridor per la selvaschina. Il project vegn ussa surdà a Berna per l'ulteriura elavuraziun.

Chaussas persunalas
- Controlla da finanzas: Johannes Hummel, Maiavilla, è vegnì elegì sco manader dals servetschs e sco substitut da l'administratur sco er sco secretari da la cumissiun da gestiun. Urs Flüeler, Cuira, è vegnì elegì sco revisur/econom da manaschi e sco manader da la secziun 1 (secturs da controlla intern ed economia publica, educaziun, cultura ed ambient, construcziun, traffic e selvicultura). Matthias Handschin, Oberegg AI, è vegnì elegì sco revisur/econom da manaschi e substitut dal manader da la secziun 2 (secturs da controlla autoritads legislativas, administraziun generala, finanzas e militar, giustia, polizia e sanitad, autoritads giudizialas).

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun