Il november ha la tele-rätia SA (TRSA) survegnì las concessiuns per derasar programs da radio e da televisiun cun la tecnica da DVB-T. Cun questa permissiun po la cumplettaziun digitala dal provediment da televisiun succeder la primavera 2005. En il rom d'ina radunanza generala extraordinaria ha la swisscom broadcast SA nominà da nov il cussegl administrativ.
L'avrigl da quest onn aveva il chantun Grischun vendì sia part d'aczias vi da la tele-rätia SA (TRSA) a la swisscom broadcast SA. Cun la concessiun da l'uffizi federal da communicaziun (UFCOM), retschavida da curt, èn uss er ademplidas las cundiziuns da contract per l'execuziun dal contract da cumpra. Il president da la regenza Klaus Huber a pudì surdar festivamain il certificat d'aczias dal chantun Grischun, q.v.d. la part d'aczias da 84.4%, a Jürg Rötheli, commember da la direcziun da la gruppa swisscom e president dal cussegl administrativ da la swisscom broadcast SA, ed a Giovanni Conti, CEO da la swisscom broadcast SA.
Cun quai è la swisscom broadcast SA il nov acziunari principal da la tele-rätia SA. Sco possessura d'infrastructura da servetschs da radio e da la transmissiun senza cabel dominanta en tut la Svizra dat la swisscom broadcast SA la garanzia per ina midada sistematica e cumpetenta da la tecnica da diffusiun analoga a la tecnica digitala.

Nov cussegl administrativ
A la radunanza generala extraordinaria da la TRSA dals 22 da december 2004 è vegnì elegì in nov cussegl administrativ. Il presidi surpiglia Giovanni Conti, CEO da la swisscom broadcast SA. Ils ulteriurs commembers èn Andreas Bolz, CFO, e René Burger, head of strategic projects. Il cussegl administrativ vertent che consista da Reto Filli, Beat Ryffel e Fabrizio Keller ha surdà la direcziun al trio elegì da nov.

Novas structuras - novas sfidas
Cun la nova direcziun strategica da la swisscom broadcast SA e grazia a la concessiun dal uffizi federal da communicaziun (UFCOM) dals 12 da november 2004 per la derasaziun da programs da radio e da televisiun cun la tecnica da DVB-T (digital video broadcasting-terrestrial) pon novas sfidas vegnir prendidas per mauns. La direcziun operativa da la TRSA resta sco fin uss tar Erwin Gantenbein. Ultra da quai duain vegnir stgaffidas novas plazzas da lavur en il sectur dal marketing e da la vendita.

Digital empè da analog
Cun la nova tecnologia da DVB-T stat a disposiziun ina nova tecnica digitala orientada vers il futur. Ella vegn a remplazzar il provediment analog vegl. La televisiun digitala vegn introducida a partir da la primavera 2005 en l'entir territori da provediment da la tele-rätia SA. Entaifer d'in onn duain gia 80% da las clientas e dals clients actuals vegnir servids cun la televisiun digitala.
Tras il grond svilup en l'entira Europa e tras ina gronda dumonda da DVB-T er a l'exteriur vischin profiteschan il chantun Grischun e las clientas ed ils clients da la tele-rätia d'ina tecnologia orientada vers il futur e da products d'auta qualitad.

Gremi: Departament da l'intern e da l'economia publica
Funtauna: rg departament da l'intern e da l'economia publica