Cun grond interess ha il departament da giustia, polizia e sanitad prendì enconuschientscha dal resultat dal scleriment da la societad d'ospitals da Cuira SA per garantir in provediment da basa e da center qualitativamain bun che correspunda als basegns da la populaziun da la regiun d'ospital da la Val dal Rain grischuna sco er da las ulteriuras regiuns d'ospital dal chantun e dal potenzial da spargnar da las trais variantas ch'èn vegnidas proponidas en quest connex da la societad d'ospitals da Cuira SA. Ils scleriments mussan che grondas pussaivladads per spargnar èn avant maun sin il plaz d'ospitals Cuira, senza che l'amplezza e la qualitad dal provediment medicinal vegnia sminuì.

Tenor il giudicat dal departament da giustia, polizia e sanitad furma questa lavur fundada da la societad d'ospitals da Cuira SA ina basa impurtanta per la discussiun che sto vegnir manada sin il plaun politic davart la concepziun futura dal plaz d'ospitals Cuira. Da vart da la politica èn adina puspè vegnidas giavischadas calculaziuns e cifras detagliadas per la procedura da decisiun. Questa pretensiun vegn ussa accumplida; e perquai po vegnir manada a partir d'immediat ina discussiun davart ils avantatgs ed ils dischavantatgs da las differentas variantas.

Per la decisiun da varianta da la regenza è decisiva - sper la tenuta dals cussegls da fundaziun da l'ospital chantunal e regiunal retic Cuira e da l'ospital da la Crusch Cuira - spezialmain er la tenuta da la corporaziun da vischnancas da la regiun d'ospital da la Val dal Rain grischuna, q.v.d. da las vischnancas pertutgadas che ston er gidar a purtar las investiziuns ed ils deficits. Il departament da giustia, polizia e sanitad vegn ad entrar en contact cun ils organs cumpetents da questas organisaziuns. Latiers ston er vegnir integradas en la discussiun dumondas davart in'utilisaziun ulteriura dals lieus d'ospital, als quals sto vegnir renunzià, e dumondas en connex cun la repartiziun futura da contribuziuns d'investiziun e da gestiun tranter il chantun e las vischnancas.

La concepziun futura dal plaz d'ospitals Cuira è ina part da la nova concepziun dal provediment chantunal d'ospitals ch'è vegnida prendida en vista da la regenza en il rom da l'examinaziun da las structuras e da las prestaziuns per sanar las finanzas dal chantun ed approvada en general dal cussegl grond en la sessiun da zercladur 2003. Il departament da giustia, polizia e sanitad ha l'intenziun d'avrir per la fin da quest onn u per il cumenzament da l'onn che vegn - suenter la decisiun preliminara da la regenza - la procedura da consultaziun per la revisiun parziala da l'ordinaziun executiva tar la lescha per promover la tgira da malsauns ch'è necessaria en quest connex.

Gremi: departament da giustia, polizia e sanitad
Funtauna: rg departament da giustia, polizia e sanitad