La regenza ha tramess en la consultaziun il sboz da las disposiziuns executivas tar l'organisaziun dal servetsch da salvament. Las disposiziuns executivas reglan la structura dal servetsch da salvament en il Grischun. Questa sa basa sin il concept da salvament da 1999 e sin la lescha correspundenta da 1997. Cun la revisiun parziala da la lescha per promover la tgira da malsauns è vegnida stgaffida l'onn 1997 la basa per introducir il clom d'agid sanitar 144 en il chantun Grischun. La consultaziun dura fin la fin da mars. Las novas disposiziuns executivas duain remplazzar a partir dal fanadur 2004 l'ordinaziun davart il transport da pazients da 1979 ch'era valaivla fin uss.

Refurma da la giustia 2: reglà detagliadamain ils emprims pass
Suenter il concept general il december 2003 ha la regenza uss er approvà il concept detaglià per las emprimas duas fasas da la refurma da la giustia 2. Quest concept circumscriva ils champs d'incumbensas e regla la relaziun tranter la cumissiun d'experts, l'expert ed il secretariat da project. Il cumenzament da l'onn 2005 vegn la cumissiun a preschentar las propostas per refurmas en furma da tesas. La realisaziun redacziunala succeda dentant pir suenter che la regenza ha approvà las tesas e repassà l'orientaziun dal cuntegn da la refurma da la giustia. Hansjörg Seiler vegn a surpigliar l'incumbensa sco cussegliader extern. Seiler è professer per dretg public, dapi l'onn 1999 derschader federal en uffizi accessori e dapi l'onn 2000 derschader administrativ en il chantun Berna.

Mesiras da spargn en il sectur d'asil: l'execuziun proponida engrevgescha las cassas chantunalas
Cun il program da distgargia 2003 vul la confederaziun er sbassar ils custs en il sectur d'asil. Concretamain na duain requirents d'asil betg pli survegnir agid social, sch'i na vegn betg entrà en lur dumondas. Las persunas pertutgadas ston bandunar la Svizra en moda independenta ed immediatamain. Per quai è necessaria la revisiun parziala da trais ordinaziuns d'asil: l'ordinaziun 1 davart dumondas da procedura, l'ordinaziun 2 davart dumondas da finanziaziun e l'ordinaziun davart l'execuziun da la spedida e da l'expulsiun da persunas estras.

La regenza grischuna sustegna da princip ils sforzs da la confederaziun da spargnar en il sectur d'asil. Cun las ordinaziuns revedidas deleghescha la confederaziun dentant ils custs da l'execuziun als chantuns. La regenza spetga perquai che la confederaziun mussia almain cleramain en tge cas concrets ch'ella surpiglia ils custs ed en tgenins betg. Per ils chantuns è ultra da quai il termin d'annunzia per rectifitgar il sistem da registratura da persunas cumbinà cun custs sproporziunadamain auts. Quests custs sto en mintga cas surpigliar la confederaziun, scriva la regenza en sia consultaziun a l'uffizi federal da fugitivs.

Da vischnancas e regiuns
- Cuira e Calantgil (Innerferrera): La regenza ha approvà la revisiun parziala respectivamain totala da las leschas da taglia correspundentas.
- Küblis: La nova lescha davart taxas da cura e taxas per promover il turissem è vegnida approvada.
- Val Bever: La lingia da la viafier retica tras la Val Bever vegn segirada cun rempars da lavinas. Il project da sanaziun da questas mesiras da segirezza dura dapi 1998. La regenza ha uss approvà la terza ed ultima etappa da realisaziun. Ils custs da questa etappa èn budgetads cun in milliun francs. Las expensas fin uss per las emprimas duas etappas dal project da rempars da lavinas "Alpetta" importan var 3,3 milliuns francs.

Contribuziuns chantunalas a differentas instituziuns
- Lottaria naziunala interchantunala: La regenza ha concedì ina contribuziun da totalmain 97'000 francs per ils novs instruments da la musica da giuvenils da Tavau e per in'occurrenza da la fundaziun "In the Spirit of Davos".
- Luvratori da l'argo a Glion: Il project per engrondir il plaun sut il tetg è vegnì approvà. La contribuziun chantunala importa var 73'000 francs.

Projects da vias
- Valragn: La construcziun d'ina fermada d'auto da posta a la via taliana ordaifer il vitg è vegnida approvada, medemamain la contribuziun chantunala da var 38'000 francs.
- Via da la Tumleastga: La regenza ha approvà il project per curreger e schlargiar la via tranter Roten e Pratval inclusiv la nova construcziun d'in passape.
- A13, La Punt-Tusaun: En il rom dal project per ina plazza da controlla per il traffic da camiuns pesants ad Unterrealta èn vegnids concedids 620'000 francs per indrizs electromecanics.

Chaussas persunalas
- Wolfgang Giella, actualmain a Göttingen (Germania) è vegnì elegì sco nov manader da la biblioteca chantunala. El cumenza sia plazza il 1. da zercladur 2004.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun