La cumissiun per ambient, traffic ed energia dal cussegl grond CATE
è sa laschada infurmar davart il project "porta alpina Sedrun" ensemen
cun il cusseglier guvernativ Stefan Engler a chaschun da sia ultima
sesida da cumissiun.
Encunter ils rapports d'enfin uss en las gazettas n'haja la
cumissiun dal cussegl naziunal betg refusà quel postulat haja gì num
davart dal represchentant dal servetsch chantunal per il traffic public.
Perquai ch'il postulat era gia avant vegnì assegnà dal cussegl dals
chantuns al cussegl federal n'ha la cumissiun dal cussegl naziunal betg
pli stuì sa fatschentar cun quai. Cun quai èn las schanzas per realisar
il project anc adina intactas.
La CATE ha prendì enconuschientscha ch'il project è realisabel tant
sut aspects tecnics sco er dal manaschi e ch'el è economicamain
interessant per il chantun e la regiun da la Surselva. D'impurtanza
speziala è per la CATE er il fatg ch'ils custs da construcziun dal
project "porta alpina Sedrun" èn pli pitschens che supponids e ch'els èn
fitg modests cumpareglià cun ils custs totals dal tunnel da basa dal
Gottard.
Da la CATE vegn dada al project - tant dal puntg da vista da
l'economia publica sco er da la politica da traffic e dal turissem - ina
gronda impurtanza per il chantun Grischun e per la regiun da la
Surselva. Ella spetga in engaschament correspundent da la confederaziun.
La CATE è dischillusa dal fatg ch'ils custs d'investiziun relativamain
pitschens n'èn anc betg vegnids resguardads èn ils credits supplementars
da la nova lingia da viafier tras las Alps NVTA ch'èn vegnids deliberads
ultimamain.
La CATE è persvasa ch'in project sco la porta alpina, ch'è per nossa
regiun ina schanza unica, na dastga betg vegnir sacrifitgà pervi da
ponderaziuns da spargn a curta vista, e quai er suenter las
communicaziuns las pli novas davart ils custs supplementars dal tunnel
da basa dal Gottard. Ils avantatgs a lunga vista domineschan.
Per quests motivs recumonda e sustegna la CATE plainamain las
stentas da la regenza e da la regiun da la Surselva per realisar il
project "porta alpina Sedrun".
Gremi: cumissiun per ambient, traffic ed energia
Funtauna: rg cumissiun per ambient, traffic ed energia