La regenza ha approvà las novas taxas pauschalas tranter ils servetschs psichiatrics dal Grischun e la federaziun santésuisse. Las taxas pauschalas per pazients staziunars (acuts, gerontos, stabels, d'alcohol, da drogas e partiziun da psicoterapia) sco er per ils pazients dal di e/u da la notg (clinica dal di per 1 di, clinica dal di per 1/2 di, pazients che dovran mo tgira) vegnan auzadas en media per 3,5 pertschient u per ses francs il di sin 177 francs. L'augmentaziun effectiva da las premias importa 0,2 pertschient. En il sectur ambulant vala la structura da tariffa tarmed dapi il 1. da schaner 2004 er per las clinicas psichiatricas. Il contract è vegnì adattà correspundentamain.

Da vischnancas e regiuns
- Flond: La radunanza communala aveva decidì l'atun da l'onn passà ina revisiun parziala da la constituziun communala. La regenza ha ussa approvà tala. Da nov ha la suprastanza communala ina cumpetenza finanziala per expensas unicas da 20'000 francs enstagl da 10'000 francs sco fin ussa.
- Rueun / Siat: Per la construcziun da barrieras en l'Ual da Valdun ha la regenza approvà ina contribuziun chantunala da 800'000 francs. Qua sa tracti d'in project consecutiv da las lavurs da reparatura pervi da las malauras dal november 2002.

Contribuziuns chantunalas a differentas instituziuns
- Orchester sinfonic d'instruments a flad dal Grischun: Sco contribuziun annuala 2004 ha la regenza approvà in sustegn finanzial da 25'000 francs da la lottaria naziunala interchantunala.

Projects da vias
- Crap Ses: Per lavurs d'impressari vi da la punt a la spunda Sera da la via dal Güglia èn vegnids approvads var 580'000 francs.

Chaussas persunalas
- Johann Wolf-Bosshard da Buchen en il Partenz è vegnì elegì sco schef da l'uffizi districtual da construcziun bassa a Tavau. El cumenza sia plazza il 1. d'avrigl.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun