Sut la direcziun dal chantun Turitg vegn a candidar gist ina entira regiun svizra per realisar ils gieus olimpics d'enviern 2014. Per garantir l'integraziun dal Grischun en il project "Turitg 2014" ha la regenza concludì da sustegnair l'annunzia dal project e da sa participar a l'elavuraziun dal dossier.

La regenza sustegna il project cuminaivel sut la direcziun dal chantun Turitg en la part da l'ost da la Svizra. Cun quest signal vul ella garantir ina collavuraziun eventuala dal Grischun gia en in stadi uschè tempriv sco pussaivel. Plinavant pari a la regenza d'esser impurtant d'esser involvida sch'i sa tracta da prender decisiuns. Ella è persvasa ch'il Grischun haja destinaziuns da sport d'enviern excellentas e possia metter a disposiziun sias experientschas cun l'organisaziun d'occurrenzas da sport d'enviern internaziunalas.

Ils 29 da favrer 2004 vegn surdada la candidatura uffiziala "Turitg 2014" a la swiss olympic association. Swiss olympic vegn alura a decider davart la candidatura svizra e - premess che las lavurs en il rom da l'ulteriur svilup dal project hajan success - preschentar quella al comité olimpic internaziunal (IOC) a temp util.

L'annunzia da Turitg 2014 sa basa sin la premissa che swiss olympic vegn a sa limitar ad ina unica candidatura svizra, quai ch'è necessari per concentrar las forzas en Svizra e per collavurar cun swiss olympic.

Envers la candidatura da Tavau resta la regenza averta. Quella vegn a vegnir giuditgada, apaina che la regenza dispona dals documents da la candidatura cun las dumondas correspundentas.

Gremi: regenza
funtauna: rg chanzlia chantunala dal Grischun