L'uffizi federal per furmaziun professiunala e tecnologia (UFFT) vegn proximamain a suttascriver l'urden d'examen per l'examen professiunal superiur da "guardiaselvaschina cun certificat professiunal federal". Uschia obtegna questa professiun la renconuschientscha uffiziala da la confederaziun.

Ils chantuns cun chatscha da patenta, singuls chantuns cun chatscha da revier ed il chantun Genevra han guardiaselvaschinas che lavuran a temp cumplain. Quests guardiaselvaschinas basegnan ina vasta savida per ademplir lur incumbensa pretensiusa en l'interess da la natira e da la chatscha. Sco intermediaturs a la "front" s'occupan els dals problems ils pli differents en il contact cun animals selvadis. Fin uss devi pliras furmas da questa professiun. Per pudair definir in standard unifitgà èsi vegnì lavurà ils ultims diesch onns cun la finamira da cuntantscher la renconuschientscha federala da questa professiun. La renconuschientscha da la professiun tras il UFFT documentescha la professiunalitad da la professiun da guardiaselvaschina.

Incumbensas multifaras
La lescha federala davart la chatscha e la protecziun dals mamifers ed utschels selvadis vul mantegnair la diversitad da las spezias ed ils spazis vitals dals mamifers ed utschels selvadis indigens e migrants, proteger spezias d'animals periclitadas, limitar sin ina dimensiun supportabla ils donns chaschunads d'animals selvadis vi dal guaud e vi da culturas agriculas sco er garantir in'utilisaziun adequata dals effectivs da selvaschina tras la chatscha.

Guardiaselvaschinas gidan ad exequir questa incumbensa legala. Els èn suttamess per regla a las administraziuns chantunalas da chatscha. Grazia a lur enconuschientschas professiunalas ed a lur enconuschientschas davart la fauna e flora locala èn ells ed els spezialists impurtants per la planisaziun da la chatscha sco er en il contact cun la natira, primarmain er en connex cun projects ch'han influenzas directas sin l'ambient natiral.

Sensibilitad è dumandada
Ils interess da la selvicultura ed agricultura, da las chatschaduras e dals chatschadurs, da las ecologistas e dals ecologists, dal turissem u da las vischnancas stattan savens en opposiziun in cun l'auter ed arrivan per part er en conflict cun ils basegns elementars dals mamifers ed utschels selvadis. Ils guardiaselvaschinas s'occupan dal bainstar dals animals selvadis ed emprovan da schliar tals conflicts d'interess. Els s'engaschan en favur d'ina chatscha regulara e confurma als basegns da la protecziun dals animals. Quai dumonda fitg gronda sensibilitad en il contact cun conumans ed insistenza per il bain da la selvaschina.

Ils chantuns tschentan differentas premissas per vegnir engaschà sco guardiaselvaschina. Ina conduita irreproschabla, l'examen da chatscha reussì, in emprendissadi terminà en ina professiun sumeglianta, abilitad corporala e buna expressiun en scrit èn mo in pèr da quellas.

Tschintg onns pratica professiunala
L'examen professiunal "guardiaselvaschina cun certificat professiunal federal" vala sco examen professiunal superiur. Las suandantas premissas ston esser ademplidas, sche persunas interessadas vulan s'annunziar a l'examen:
- in'activitad d'almain tschintg onns sco guardiaselvaschina tar in chantun u tar purtaders publics;
- avair frequentà in curs fundamental interchantunal e reussì ses examens (dura quatter giadas in'emna, repartì sin dus onns).

L'examen premetta in pensar cumbinatoric. Animals selvadis e lur spazis vitals furman ecosistems sensibels. Las candidatas ed ils candidats ston perquai savair cumbinar ed inditgar ils connexs. La premissa per quai èn vastas enconuschientschas da l'ecologia e da la fauna. Perquai ch'ils guardiaselvaschinas exequeschan leschas, dovran els enconuschientschas giuridicas e polizialas. Ellas ed els organiseschan per gronda part sez lur manaschi da servetsch. Da quai fa part er la lavur da biro. Ils roms da l'examen sa cloman pia: ecologia, biologia, manaschament d'animals selvadis e da spazis vitals, tecnica, dretg e polizia, organisaziun ed administraziun.

Il UFFT surveglia l'examen
La federaziun svizra dals guardiaselvaschinas vul realisar l'emprim examen professiunal l'onn 2005: Per quest intent ha ella elegì ina cumissiun d'examen che consista da tschintg guardiaselvaschinas e da dus administraturs da chatscha. Ella organisescha l'examen, elegia ils experts e decida da conceder il certificat professiunal. Il UFFT surveglia l'examen.

La federaziun svizra dals guardiaselvaschinas (FSGS)
Ils 21 d'avust 1999 han las uniuns e federaziuns da guardiaselvaschinas da Berna, dal Grischun, dal parc naziunal, da la Svizra franzosa, da Son Gagl, dal Tessin, dal Vallais e da la Svizra centrala fundà la FSGS. Totalmain fan part var 250 guardiaselvaschinas e survegliaders da chatscha a la federaziun. Els ston esser engaschads per almain 50 pertschient en il sectur da la chatscha, e quai dal maun public. I sa tracta exclusivamain da glieud da professiun che collavura tar l'execuziun da la legislaziun federala e chantunala da chatscha.

La finamira la pli impurtanta da la federaziun è quella da mantegnair e promover l'acceptanza, la qualitad e la reputaziun dal mastergn da guardiaselvaschina. L'emprima mesira ha empruvà da cuntanscher la renconuschientscha da la professiun tras l'uffizi federal per furmaziun professiunala e tecnologia (UFFT, avant Biga). Quai pretenda da promover la scolaziun e furmaziun cuntinuada professiunala. La FSGS vegn en l'avegnir a sa preschentar cun dapli giavischs a la publicitad, quai ch'è in'autra da sias finamiras. A medem temp vegn la federaziun a tschertgar il contact cun gruppas professiunalas ed organisaziuns sumegliantas en il sectur da la chatscha, da la natira sco er da la protecziun dals utschels e dals animals. La finala duai profitar er la collegialitad tranter ils guardiaselvaschinas.

Ils commembers da la suprastanza vegnan dals chantuns Berna (Sébastien Balmer), Son Gagl (Markus Brülisauer), Friburg (Elmar Bürgy), Grischun (Arturo Plozza) e Sviz (Pius Reichlin). Uschia è garantida la represchentanza regiunala e la diversitad linguistica da la Svizra.

Gremi: uffizi da chatscha e pestga
Funtauna: rg uffizi da chatscha e pestga