En l'onn idrologic 2002/2003 èn vegnidas consumadas en Grischun 1783
milliuns uras kilowat d'energia. En cumparegliaziun cun la perioda da
l'onn passà è il consum cun plus 0,2 pertschient praticamain sa
stabilisà. La producziun da forza electrica è stada durant la medema
perioda cun 7862 milliuns uras kilowat ca. in pertschient sur la media
da plirs onns.
Las ovras electricas dal Grischun annunzian mintg'onn lur consum e
lur producziun da forza electrica a l'uffizi d'energia. Da la statistica
ch'è vegnida fatga en quest connex resulta per l'onn idrologic 2002/2003
(october 2002 fin october 2003) il suandant resultat:
Consum da forza electrica praticamain stabil
Il consum da forza electrica è cun 1783 milliuns uras kilowat restà
quasi il medem cumpareglià cun la perioda da l'onn passà (perioda
precedenta 1780 milliuns kWh). El è s'augmentà mo per 0,2 pertschient.
Sch'ins guarda las singulas gruppas da consum ha importà l'augment
da consum en il sectur da las chasadas, dal mastergn, da l'agricultura e
da las prestaziuns da servetschs e da las viafiers (VR, VFF, viafer
Matterhorn Gotthard) ca. 1 pertschient.
Tar l'industria gronda è il consum d'energia dentant sa sminuì per
ca. sis pertschient. Quai pon ins essenzialmain attribuir al fatg che
l'interpresa da plattas pressadas a Fideris è vegnida serrada. La
serrada da l'interpresa ha per l'emprima giada in effect sin l'entira
perioda registrada.
Il consum da forza electrica en Svizra è s'augmentà en la medema
perioda cumpareglià cun la perioda precedenta per 1,4 pertschient a
54'775 milliuns uras kilowat (perioda precedenta 54'041 milliuns uras
kilowat).
Pli gronda producziun da forza electrica
La producziun da forza electrica da las ovras electricas dal
Grischun è stada cun 7862 uras kilowat (perioda precedenta 7708 milliuns
uras kilowat) malgrà la setgira da la stad per ca. in pertschient pli
gronda che la media da plirs onns.
Las ovras electricas da la Svizra han producì en la medema perioda
38'313 milliuns uras kilowat (36'069 milliun uras kilowat). La part dal
Grischun da la producziun da forza electrica idraulica en Svizra ha
importà 20,5 pertschient (21,4 pertschient) ed 11,7 pertschient (12
pertschient) da la part da l'entira producziun da forza electrica en
Svizra.
Gremi: uffizi d'energia
Funtauna: rg uffizi d'energia