Ensemen cun cusseglier guvernativ Martin Schmid è la cumissiun dal
cussegl grond per sanadad e fatgs socials sa deditgada tranter auter al
"concept da las disciplinas dals ospitals da Cuira SA". Il rapport
respectiv sclerescha las pussaivladads da spargn sin la plazza d'ospital
da Cuira. Il medem mument renda el attent a la garanzia d'in provediment
da basa e da center qualitativamain bun che correspunda als basegns da
la populaziun da la regiun d'ospital da la Val dal Rain grischuna e da
tut l'intschess cumpiglià dals ospitals.
La cumissiun ha approfundà sias enconuschientschas a maun da studis
detagliads. Plinavant è ella sa fatschentada intensivamain cun ils
diesch scenaris, preschentads dal cussegl d'administraziun e da la
direcziun da manaschament dals ospitals da Cuira SA, che prevesan trais,
dus u ina suletta plazza d'ospital. Ultra d'arguments areguard
l'economia da manaschi, la politica e l'orientaziun a la prestaziun ed a
la qualitad, han er aspects giuridics chaschunà discussiuns extendidas.
Cusseglier guvernativ Schmid ha pudì respunder a moda cuntentanta la
gronda part da las dumondas e declerar l'ulteriur proceder.
La cumissiun è alura sa fatschentada cun evaluaziuns concernent la
purschida da prestaziuns, la qualitad e la rentabilitad sco er cun las
consequenzas da la realisaziun dals singuls scenaris sin ils ospitals
regiunals. Avant ch'il concept da la plazza d'ospital da Cuira possia
vegnir tractà en il cussegl grond, vegn la regenza incumbensada da
preschentar in studi davart l'ulteriura utilisaziun dals edifizis che na
vegnan betg pli duvrads. A la cumissiun para plinavant impurtant che las
plazzas d'ospital da fin uss na dastgian betg servir ad ina interpresa
che concurrenzescha l'ospital.
Cunquai che 70 fin 80 pertschient dals custs da gestiun d'in ospital
èn custs da persunal, èsi cler per la cumissiun ch'ils respargns ils pli
gronds pon vegnir fatgs tar il persunal. Medemamain èsi cler che
respargns prognostitgads en l'autezza da totalmain var diesch milliuns
francs per onn na pon betg vegnir fatgs senza reducir il persunal.
Quests respargns vegnan per gronda part cuntanschids cun eliminar
duplicitads e cun trair a niz sinergias cun p.ex. mo pli ina cafeteria,
ina cuschina, in'ustaria da chasa, ina centrala da telefon ed ina
recepziun. Gronds respargns portan la fusiun da tut la chirurgia e da
tut la medischina interna sco er la fusiun dals manaschis d'urgenza da
24 uras. Il rapport mussa che la reducziun previsa da plazzas en las
gruppas professiunalas dals medis (ca. minus set plazzas) e da la tgira
(ca. minus ina plazza) na sminueschan betg la purschida da prestaziuns e
la qualitad.
Il nov concept d'ospital vegn a cumenzar pir ils onns 2009/2010. La
reducziun da totalmain var 84 plazzas vegn uschia a succeder durant
plirs onns. Relaschadas duessan e pon pia vegnir evitadas.
Suenter ina discussiun pli lunga e suenter avair ponderà
precautamain ils interess pussaivels, ha la cumissiun sustegnì - cun
diesch vuschs ed in'abstenziun - la soluziun cun ina suletta plazza
d'ospital a Cuira. Suenter il lung temp da malsegirezza davart la plazza
d'ospital da Cuira èsi impurtant per la cumissiun che las decisiuns
politicas vegnian prendidas per mauns a moda speditiva.
Gremi: cumissiun per sanadad e fatgs socials
Funtauna: rg cumissiun per sanadad e fatgs socials