La cassa da pensiun chantunala dal Grischun (CP) guarda enavos sin in onn d'investiziun cun in fitg bun success. Cun ina rendita dad 11,8 pertschient sin las investiziuns da vaglias ha ella cuntanschì l'onn passà in resultat sur la media en cumparegliaziun cun autras cassas da pensiun. Tenor in'enquista da l'associaziun da las cassas da pensiun ASIP tar differentas cassas da pensiun ha la media da la rendita da la facultad da vaglias consolidada importà 9,5 pertschient.

La rendita da la CP sin la facultad totala importa 8,4 pertschient. Al bun resultat han contribuì en spezial las investiziuns en aczias, las qualas vegnan administradas tenor il concept d'investiziun anticiclic che vegn applitgà dapi onns. Suenter onns cun gronds deficits dals curs ha l'onn 2003 purtà ina midada da tendenza a las bursas d'aczias.

Cun integrar reservas avertas e zuppadas è sa meglierà il grad da garanzia - il qual exprima la relaziun da la facultad tar la summa da las obligaziuns - da 67,4 pertschient a 69,5 pertschient. Il deficit calculà tenor la tecnica d'assicuranza è sa reducì da 554,7 milliuns francs a 549,3 milliuns francs.

Da vart da la tecnica d'assicuranza ha stuì vegnir acceptà in grond augment dals cas d'invaliditad, ils quals engrevgeschan considerablamain il quint. Quai ha impedì in resultat anc meglier tar il grad da garanzia.

Tenor il conclus dal cussegl grond duai la finanziaziun restanta da la CP succeder a partir dal 1. da schaner 2005 tras las patrunas ed ils patruns associads obligatoriamain. Per questa finanziaziun restanta vegn ad esser decisiv il deficit sco ch'el sa mussa ils 31 da december 2004.

Gremi: cassa da pensiun chantunala dal Grischun
Funtauna: rg cassa da pensiun chantunala dal Grischun