En il rom da l'examinaziun da las structuras e da las prestaziuns per sanar las finanzas dal chantun ha il cussegl grond concludì da limitar ils dumbers d'admissiun a las scolas medias. Questa mesira è restrenschida per ils onns da scola 2004/05, 2005/06, 2006/07 e 2007/08. Dals 15 als 19 da mars 2004 han gì lieu ils emprims examens d'admissiun en la terza classa dal gimnasi ed en las quartas classas da las scolas medias professiunalas (avant: scola media da diplom) sco er da las scolas medias commerzialas cun las cundiziuns da basa midadas.

Cun la mesira 332 è vegnida messa la limita maximala per ils dumbers d'admissiun a las scolas medias per l'onn da scola 2004/05 sco suonda (cifras en parantesa = examens reussids da l'onn precedent): gimnasi maximalmain 204 (224), scola media professiunala/commerziala maximalmain 158 (176). Ils examens, che han lieu en moda unitara ed il medem mument en tut las scolas medias grischunas, han pudì vegnir realisads cun success e las directivas dal cussegl grond han pudì vegnir observadas. Las dumondas dals examens èn vegnidas preparadas communablamain da represchentantas e represchentants da las scolas secundaras e da las scolas medias.

Dal dumber total da 576 candidatas e candidats han 359 ademplì las cundiziuns d'admissiun. Quai correspunda ad ina part da 62,3 pertschient da scolaras e scolars ch'èn vegnids admess. Repartids tenor partiziuns han reussì l'examen d'admissiun 202 da 367 candidatas e candidats u 55 pertschient al gimnasi e 157 da 209 candidatas e candidats u 75 pertschient a la scola media professiunala/commerziala.

Gremi: uffizi per las scolas medias
Funtauna: rg uffizi per las scolas medias