La regenza ha deliberà la missiva tar la revisiun da la lescha davart la planisaziun dal territori per il chantun Grischun (LPTGR) per mauns dal cussegl grond. Il parlament vegn a tractar quella en la sessiun d'avust 2004.

Gronda prioritad en la revisiun han las mesiras per simplifitgar ed accelerar las proceduras da la planisaziun dal territori. Differentas varts crititgeschan questas proceduras gia dapi ditg sco memia lungas, plaunas e charas. Quest sectur è exponì al squitsch d'al refurmar. La revisiun proponida gida a meglierar considerablamain las proceduras; quai è in fatg ch'è fitg bainvegnì per il Grischun sco lieu economic e da turissem. En il center stattan regulaziuns per coordinar adequatamain las proceduras, per reducir il temp da passadi tras las instanzas tar proceduras chantunalas per edifizis e stabiliments ordaifer la zona da construcziun sco er prescripziuns unifitgadas en l'entir chantun per las proceduras sco p.ex. la procedura per la permissiun da construcziun, la procedura per il plan da quartier u la procedura da perimeter. Cumplettadas vegnan las mesiras legalas da procedura cun optimar l'organisaziun entaifer l'administraziun.

In rinfrestgament da la lescha ch'è 30 onns veglia
In'ulteriura prioritad dal project èn las flexibilisaziuns tar ils instruments da planisaziun. Quels vegnan concepids uschia, ch'ins po reagir a temp sin ils basegns da l'economia publica che sa midan adina pli spert, e quai senza stuair desister dal progress succedì en favur da la natira e da l'ambient. Da las numerusas ulteriuras novaziuns ston ins accentuar plinavant las refurmas per promover ina buna concepziun dals abitadis, las regulaziuns per realisar las novas normas federalas davart il construir tenor ils basegns da persunas cun impediments sco er la creaziun d'in cler urden da cumpetenzas per chastiar activitads illegalas da bajegiar ordaifer la zona da construcziun. A medem temp han ins profità da l'occasiun per suttametter la lescha vertenta, che deriva en general da l'onn 1973 e ch'è pia gia passa 30 onns veglia, ad in rinfrestgament retardà, ad in'actualisaziun ed ad in sgumbrament e d'adattar las disposiziuns anteriuras al dretg surordinà ch'è sa midà en il fratemp.

Cun questas finamiras e prioritads ha il project chattà buna accoglientscha en la vasta consultaziun da l'atun passà. Las novaziuns restan per gronda part incontestadas.

Gremi: regenza
Funtauna: rg departament da l'intern e da l'economia publica