Navigation

Inhaltsbereich

  • Erste Mitteilung
  • Neuen Beitrag einfügen
Ils 31 da matg 2004 spirescha l'emprim termin transitori da la cunvegna cun l'uniun europeica UE davart la libra circulaziun. A partir da quel termin na basegnan burgaisas e burgais dal territori da la UE/da l'associaziun europeica da commerzi liber (AECL) che pratitgeschan in'activitad da gudogn nagina permissiun da dimora pli per ina dimora da maximalmain trais mais. L'obligaziun da dumandar ina permissiun vegn remplazzada d'ina obligaziun d'annunzia. L'uschenumnada "examinaziun en connex cun il martgà da lavur" e la preferenza da las Svizras / dals Svizzers croda dal tuttafatg.

Las cunvegnas bilateralas cun la UE, ch'èn en vigur dapi il 1. da zercladur 2002, entran en ina segunda fasa. La cunvegna davart la libra circulaziun sco part integrala da questas cunvegnas prevesa ulteriuras facilitaziuns per burgaisas e burgais dal territori da la UE/AECL. Per dimoras da lavur da fin a trais mais tar patruns en Svizra remplazza l'obligaziun d'annunzia l'obligaziun da dumandar ina permissiun. Er firmas da l'exteriur che han il dretg da trametter lur collavuraturas e collavuraturs fin a 90 dis a l'onn en noss pajais per liquidar incumbensas, suttastattan a l'obligaziun d'annunzia e betg pli a l'obligaziun da dumandar ina permissiun.

L'examinaziun en connex cun il martgà da lavur croda
L'examinaziun en connex cun il martgà da lavur, q.v.d. la controlla che las cundiziuns da lavur e da salari localas e da la professiun vegnian resguardadas sco er la controlla da la preferenza da las Svizras / dals Svizzers crodan. Per las petentas ed ils petents signifitgescha quai ch'i na ston vegnir inoltrads nagins contracts da lavur en connex cun la procedura da permissiun. Er la cumprova d'ina tschertga senza success da lavurantas e da lavurants ch'èn gia admess sin il martgà da lavur svizzer, n'è betg pli necessaria.

Per proteger il mastergn indigen da la concurrenza estra cun ses salaris bass sco er per evitar in dumping da salari vegnan realisadas las suandantas mesiras da sustegn a partir dal 1. da zercladur 2004: Ils organs da controlla ch'èn cumpetents per las branschas correspundentas controllan en ils manaschis e sin ils plazzals che las cundiziuns da lavur e da salari vertentas localas e da la professiun vegnian resguardadas.

Nagina schluccada per ils novs stadis da la UE
Las burgaisas ed ils burgais dals novs stadis da la UE na pon betg profitar da la cunvegna davart la libra circulaziun. Il cussegl federal insista per il mument sin la pratica d'admissiun fitg restrictiva envers burgaisas e burgais da quests stadis. Il termin per eventualmain applitgar la libra circulaziun per burgaisas e burgais dals novs stadis da la UE n'è actualmain betg anc previsibel.

Per lavurantas e lavurants esters che suttastattan a l'obligaziun da dumandar ina permissiun vala vinavant in termin d'annunzia dad otg dis che sto vegnir resguardà tar la controlla d'abitants. Independentamain da quest termin dastga ina forza da lavur estra, per la quala sto vegnir dumandada ina permissiun, pir cumenzar a lavurar ed in patrun dastga dar lavur ad ella pir sch'ella è annunziada.

Gremi: uffizi da polizia ed uffizi per industria, mastergn e lavur
Funtauna: rg uffizi da polizia ed uffizi per industria, mastergn e lavur
Neuer Artikel