Cun 1793 suttascripziuns valaivlas è reussì il referendum cunter la
"lescha per promover il svilup economic en il chantun Grischun (LSE)".
La regenza ha fixà ils 26 da settember per questa votaziun dal pievel.
Minimalmain fissan stadas necessarias 1500 suttascripziuns d'abitantas e
d'abitants dal chantun.
La nova regulaziun davart ils supplements per uffants entra en vigur
il 1. da schaner 2005
La regenza ha mess en vigur la nova lescha davart ils supplements da
famiglia (LSF) per il 1. da schaner 2005 e medemamain las disposiziuns
executivas correspundentas. La nova lescha prevesa da pajar ils
supplements per uffants cumplains gia a partir d'in grad d'occupaziun da
20 pertschient. En quest connex vegnan er resguardadas quellas persunas
che procuran effectivamain per il mantegniment dals uffants. Finalmain
regla la nova lescha er la gulivaziun da las grevezzas tranter las
singulas cassas da cumpensaziun per famiglias.
Cun 82 pertschient vuschs affirmativas avevan las votantas ed ils
votants acceptà la nova LSF il cumenzament da favrer 2004.
Fixà definitivamain il termin d'annunzia per ils resultats da
votaziun da las vischnancas
La votaziun per correspundenza è en moda. Perquai pon las
vischnancas annunziar pli baud lur resultats a la chanzlia chantunala la
dumengia da votaziun. Tenor las directivas da la regenza che vegnan
publitgadas en il fegl uffizial mintgamai avant ina votaziun ston las
vischnancas annunziar ils resultats fin las 13.30. Quest termin
d'annunzia è sa cumprovà en la pratica e po perfin vegnir resguardà da
las vischnancas grondas tar ina votaziun ch'è dotada en moda normala. La
regenza ha concludì da fixar definitivamain il termin d'annunzia da las
13.30 (fin ussa 14.30) ussa er en la "ordinaziun per manar ils registers
electorals e la procedura da votaziun".
Il chantun venda sia participaziun vi da la Atel
Il chantun Grischun venda sias 1800 aczias nominativas da la
Aare-Tessin SA per electricitad (Atel), Olten. La regenza ha fixà il
pretsch minimal per aczia a 1250 francs. Per il chantun na datti
actualmain nagins motivs da la politica da finanzas u d'energia per
mantegnair la participaziun da 0,6 pertschient dal chapital d'aczias da
la Atel.
Da vischnancas e regiuns
- Valendau / Versomi: La regenza ha approvà la fusiun dals reviers
forestals da domaduas vischnancas al nov revier forestal Ruinaulta.
Chaussas persunalas
- Per il 1. da settember èn Larissa Wild Suà da Bellinzona ed
Esterina Degiacomi da Peiden vegnidas elegidas sco cussegliadras da
scola e d'educaziunen en l'uffizi per la scola populara ed il sport.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun