La realisaziun dal program da sanaziun pretenda ulteriuras adattaziuns da leschas. La regenza ha deliberà la missiva collectiva correspundenta per mauns dal cussegl grond. I sa tracta da nov leschas e d'ina ordinaziun dal cussegl grond. Uschia pon vegnir realisadas sis mesiras da distgargia.

Las sis mesiras per l'examinaziun da la structura e da las prestaziuns vegnan a distgargiar las finanzas dal chantun a partir dal 2005 mintg'onn supplementarmain per ca. indesch milliuns francs. Da gronda impurtanza finanziala è en quest connex - cun ca. 2,4 milliuns francs en media per onn - la cumpensaziun da la garanzia chantunala tras la banca chantunala grischuna. Per quest intent ston vegnir adattadas la lescha davart la banca chantunala grischuna e l'ordinaziun correspundenta.

Gist tschintg leschas ston vegnir midadas per installar ina suletta instanza da recurs en il sectur d'educaziun: la lescha da scolina, la lescha da scola, la lescha davart las scolas medias, la lescha davart la furmaziun professiunala e la lescha davart la scola'auta professiunala da pedagogia. Las ulteriuras midadas da lescha concernan la lescha chantunala davart la protecziun da datas per scuntrar da nov las prestaziuns da servetsch da l'incumbensà chantunal per protecziun da datas cun las vischnancas, la lescha davart l'agid en cas da catastrofas per reducir la part chantunala dals custs vi da la scolaziun da protecziun civila e per pudair desister da contribuziuns d'investiziun a las vischnancas per implants da l'organisaziun da protecziun civila, sco er la lescha da chatscha per introducir multas disciplinaras en cas d'ina cuntravenziun da chatscha.

Accelerà a moda speditiva la realisaziun dal program da sanaziun
Il preventiv 2004 resguarda gia ca. 180 da las totalmain ca. 220 mesiras dal program da sanaziun. Il volumen da distgargia per 2004 importa uschia ca. 51 milliuns francs en il quint current e ca. 20 milliuns francs en il quint d'investiziun.

Per realisar tut las mesiras da l'examinaziun da la structura e da las prestaziuns per sanar las finanzas dal chantun ston vegnir revedidas en tut ca. 25 leschas e 20 ordinaziuns dal cussegl grond. Fin uss èn vegnidas adattadas ca. la mesadad da quellas.

Las vias da colliaziun duain vegnir renconuschidas
Sco ulteriura missiva al cussegl grond ha la regenza deliberà la renconuschientscha dal dretg d'ina via chantunala da colliaziun da las vischnancas da Panaduz e da Malix. En quest connex duain vegnir renconuschidas sco colliaziuns chantunalas la via da Panaduz-Campagna fin al plaz da staziunament en il territori da Gurgs sin ina lunghezza da ca. 1 km e la via da Malix-Brambrüesch fin a la bifurcaziun da la "via d'enviern" sin ina lunghezza da var 3,5 km. La regenza quinta cun custs supplementars da ca. 66'000 francs per il mantegniment dal manaschi inclusiv il servetsch d'enviern e cun totalmain ca. ina mesa plazza dapli en dus uffizis districtuals da construcziun bassa.

"Alarm general" cun dapli sirenas e cun telecumond
En las vischnancas dal Grischun duain vegnir installadas fin la fin dal 2006 ca. 250 novas sirenas staziunaras per il "alarm general". Las ca. 100 sirenas veglias sco er las novas vegnan ultra da quai equipadas cun in telecumond. La centrala d'alarm e d'acziuns da la polizia chantunala a Cuira po uschia metter en funcziun tut las sirenas sin plaun chantunal e districtual. Las sirenas en las dudesch organisaziuns da protecziun civila pon vegnir messas en funcziun en ils singuls posts da commando da direcziun tant separadamain sco er per tut la regiun. L'onn 2004 vegnan installadas en in'emprima etappa ca. 50 sirenas en ils districts dal Plaun, da la Plessur, da Landquart e dal Partenz/Tavau.

Il nov concept per alarmar è vegnì elavurà en vista a la realisaziun da la nova lescha federala davart la protecziun da la populaziun e la protecziun civila (LPPC). Tras quella daventan l'acquisiziun e la finanziaziun dals sistems d'alarm da nov incumbensas federalas. La LPPC è en vigur dapi il 1. da schaner.

Da vischnancas e regiuns
- Susch/Lavin: La regenza ha approvà ils novs statuts dal consorzi da scola primara e da scolina da las vischnancas da Susch e Lavin. La revisiun ha cumpiglià principalmain la repartiziun dals custs e la cumpetenza da finanzas dal cussegl da scola.
- La nova creaziun da la lescha davart las taxas da cura e la taxa per promover il turissem d'Andiast, la revisiun parziala da la lescha davart las taxas da cura da Segl e la revisiun totala da la lescha da taglia da Mesauc èn vegnidas approvadas.
- Mantogna dadens: Sin il traject da Tschappina sura a Glas è vegnì auzà il pais maximal da 11 a 13 tonnas. Durant in temp d'emprova da dus onns vala davent da Tschappina sura fin a la bifurcaziun da Obergmeind in pais maximal da 18 tonnas (enfin uss 13) ed ina ladezza maximala da 2,55 meters (empè da 2,3 meters), e quai dal zercladur fin la fin d'october. Autobus dastgan avair ina lunghezza da maximalmain 12 meters.
- Sta. Maria C.: La vischnanca survegn ca. 250'000 francs sco contribuziun per las lavurs da stizzar l'incendi da guaud en il territori dal Piz di Renten. In chametg aveva chaschunà l'incendi la stad 2003.
- Trun: Il project da dustanzas "Val Campliun" è vegnì approvà sco project consecutiv da las malauras 2002. Per quest survegn la vischnanca totalmain ca. 510'000 francs. Questas mesiras cun rempars servan er a proteger la via sursilvana.
- Vischnanca da Tavau: Il project da dustanza "ual dal Flüela" duai reducir la ristga d'inundaziun en il territori d'abitadi sin in mesira tolerabla. La regenza ha deliberà per quai ina contribuziun da ca. 187'000 francs. Il project serva medemamain a proteger la via dal Flüela.
- Churwalden: Sin la via dal Güglia vegn construida en il vitg ina insla da segirtad sper il passadi da peduns "Witibachbrücke". La regenza ha approvà il project correspundent inclusiv las adattaziuns necessarias da la via chantunala.

Contribuziuns chantunalas a differentas instituziuns
- Catastrofa da terratrembel en l'Iran: En favur da l'acziun d'agid d'urgenza da la crusch cotschna svizra en la citad da Bam ha la regenza concludì 10'000 francs.
- Lottaria naziunala interchantunala: Totalmain ca. 230'000 francs ha la regenza approvà per quatter projects: per cumprar diversas ovras d'art sco ornament da biro per l'administraziun, per edir il cudesch illustrà "La Greina - la vallada alpina tranter Sumvitg ed il Blegn", per unifurmar da nov la societad da musica da Ftan sco er per l'exposiziun "naiv - rauba alva miraculusa" dal museum d'art dal Grischun, dal museum grischun da la natira e dal museum retic.

Projects da vias
- Per lavurs da construcziun, lavurs d'impressari e lavurs sanitaras vi da la via da colliaziun Trun - Schlans sco er vi da la plazza da pussar Rofla e vi dal conduct d'idrants Rofla (vart dal nord da la ruta dal San Bernardin) ha la regenza approvà totalmain ca. 1,7 milliuns francs.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun