Il tema "guaud", sco unitad geografica, occupa divers uffizis: L'uffizi forestal UF è cumpetent per la planisaziun dal svilup dal guaud, l'uffizi d'agricultura, meglieraziun da structura e mesiraziun UAMM registrescha la surfatscha d'utilisaziun agricula che po sa midar tut tenor il curs da la lingia da l'ur dal guaud, l'uffizi da planisaziun UP resguarda il guaud sco "zona" e l'uffizi per la natira e l'ambient UNA fa ils inventaris sco per exempel quel dals guauds da riva.
Ils quatter uffizis UF, UAMM, UP e UNA coordineschan uss lur lavur cun agid dal sistem d'infurmaziun geografica SIG en il sectur da la lingia da l'ur dal guaud: La lingia vegn coordinada là, nua che quai è necessari per l'execuziun da la lescha, per la planisaziun u per la projectaziun ed ella vegn registrada e cumplettada sur il SIG tenor directivas unifitgadas. Cumpetent per quai è l'uffizi forestal. La regenza ha prendì enconuschientscha dal concept correspundent.

Maturitad professiunala: sur la "passarella" a l'universitad
Cun ina maturitad professiunala en giaglioffa daventa uss pussaivel er l'access ad ina universitad. Per quest intent ston ins far in examen supplementar. Il chantun Grischun sustegna la scolaziun correspundenta da la scola interchantunala da maturitad per creschid(a)s Son Gagl/Sargans SIMC. La part dals custs dal Grischun a la scolaziun "passarella maturitad professiunala-scol'auta universitara" sa munta a var 35'000 francs.

Premis per concurrenzas d'emprendist(a)s: la regenza sa distatga
Las contribuziuns a concurrenzas d'emprendist(a)s èn vegnidas concludidas fin uss da la regenza. Per il 1. da fanadur vegn surdada questa cumpetenza a l'uffizi per la furmaziun professiunala. La regenza ha approvà la midada dal reglament "contribuziuns a concurrenzas d'emprendist(a)s". La nova regulaziun duai simplifitgar las vias administrativas correspundentas. Ils ultims onns èn vegnidas pajadas contribuziuns per concurrenzas d'emprendist(a)s da mintgamai 1000 fin 2500 francs.

Da vischnancas e regiuns
- Novas regulaziuns da taxas: La regenza ha approvà la revisiun da la lescha davart las taxas da cura e la promoziun dal turissem dad Avras ed il reglament davart la contribuziun da cura da Nufenen.
- Nova constituziun communala: La constituziun communala revedida da Domat è vegnida approvada da la regenza. Il catalog d'incumbensas e da cumpetenzas dal cussegl da scola vegn da nov integrà en la lescha da scola e da scolina. La nova lescha è vegnida concludida il mars dal cussegl communal.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun