Il cussegl grond dal Grischun vegn a tractar la nova lescha da polizia en la sessiun d'october 2004. La regenza ha deliberà la missiva correspundenta.

La lescha da polizia definescha ils champs d'incumbensa da la polizia chantunala, regla sia collavuraziun cun autoritads federalas, cun las polizias communalas, cun corps da polizia d'auters chantuns, cun organisaziuns privatas da segirezza e cun l'exteriur. Cun la nova lescha po vegnir abolida l'ordinaziun vertenta davart la polizia chantunala da l'onn 1974.

Tar las trais incumbensas principalas da la polizia chantunala tutgan las uschenumnadas "incumbensas da polizia da segirezza". La polizia chantunala duai enconuscher a temp privels e disturbis smanatschants, duai impedir ed eventualmain dustar quels e puspè restabilir il stadi da dretg. Sco "polizia giudiziala" retschertga ella e fa denunzias e sco "polizia da traffic" marchescha ella sia preschientscha sin via.

La consultaziun da la lescha davart la procedura penala è averta
Il sboz da la revisiun parziala da la procedura penala chantunala è avant maun. La regenza l'ha deliberà per la consultaziun. La revisiun è necessaria, perquai che la revisiun dal dretg penal (part generala dal cudesch penal svizzer) entra previsiblamain en vigur l'onn 2006. La revisiun da la procedura penala chantunala cumpiglia principalmain las adattaziuns a la revisiun dal cudesch penal, alura dentant er la reorganisaziun d'ina via grischuna da dus stgalims concernent ils meds legals e l'aboliziun da la cumpetenza da las autoritads da scola en la giurisdicziun penala per giuvenils. La consultaziun dura fin la fin d'avust 2004.

Ils custs da la scolaziun avant l'emprendissadi s'augmentan
La frequentaziun d'uschenumnadas instituziuns da scolaziun preprofessiunala, quai vul dir las classas da tscherna da professiun, las classas d'economia da chasa, l'onn pratic professiunal e l'onn social, vegn in pau pli chara. La regenza ha dauzà las taxas da scola maximalas per 250 francs a 1750 francs. Quai correspunda a la chareschia accumulada dapi l'onn 1991. La nova tariffa vegn introducida a partir da l'onn da scola 2005/06.

Da vischnancas e regiuns
- Sour: La regenza ha approvà la nova lescha davart la taxa da cura e davart la contribuziun per promover il turissem. La vischnanca na dastga dentant betg pretender ina pauschala da taxas da cura per stagiun ed occurrenza dals alloschaders e / u dals organisaturs. Oriundamain aveva la lescha previs quai.
- Lostallo: Il termin da carenza per il dretg da votar da las persunas domiciliadas - che durava fin uss trais mais - è abolì. La regenza ha approvà la revisiun correspundenta da la constituziun communala.
- Reducziuns dal tempo: En la part dal vitg da Flem "Casa d'uaul vest" vegn introducì il tempo 30. En il sectur da l'ospizi dal Flüela, per lung da 170 meters, vegn la sveltezza maximala reducida a 60 kilometers per ura.

Contribuziuns chantunalas a differentas instituziuns
- Claustra-Serneus: La regenza ha approvà ca. 290'000 francs per il project da rempar "Tal" per retegnair bovas e lavinas. Il preventiv dals custs totals importa ca. dus milliuns francs.
- Stagiun dals open-airs 2004: Ca. 23'000 francs en tut èn vegnids approvads per otg open-airs grischuns: Scharàns, Lan Müraia (Bregaglia), Valragn, Altaun / Valendau, Stussavgia, Val Lumnezia, Chapella e Malans.
- Taxaziun da las taglias sin las entradas e sin la facultad: Per la controlla d'entrada, per la registraziun preliminara da las datas e per las lavurs da taxaziun sco talas survegnan las vischnancas ina indemnisaziun dal chantun mintgamai la mesadad da l'onn. Quest onn èn quai ca. 6,7 milliuns francs ch'èn vegnids approvads da la regenza.

Projects da vias
Per ca. quatter milliuns francs ha la regenza approvà differentas lavurs da construcziun vi da trajects da vias e punts sco er en tunnels da la rait da vias dal Grischun:
- A 13: tunnels Rofla e Traversa, gallaria Rofla, rampa d'access Rofla;
- Scuol-Tarasp: Vulpera-Pisoc;
- via dal Partenz: sviament da Claustra.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun