En il rom da l'examinaziun da las structuras e da las prestaziuns per sanar las finanzas dal chantun ha il cussegl grond concludì da limitar ils dumbers d'admissiun a las scolas medias. Questa mesira è restrenschida per ils onns da scola 2004/05, 2005/06, 2006/07 e 2007/08. Il cumenzament da zercladur 2004 han gì lieu ils examen d'admissiun per ils gimnasis inferiurs da las scolas medias dal Grischun. En la mesira 332 è vegnì fixà ch'i vegnan admess maximalmain 274 scolaras e scolars als gimnasis inferiurs da las scolas medias dal Grischun per il cumenzament da l'onn da scola 2004/05. L'onn precedent èn vegnids admess 304 scolaras e scolars. Ils examens, che han lieu en tut las scolas medias grischunas en moda unitara ed il medem mument, han pudì vegnir realisads cun success e las directivas dal cussegl grond han pudì vegnir observadas. Las dumondas dals examens èn vegnidas preparadas communablamain da represchentantas e represchentants da las scolas secundaras e da las scolas medias.
Dal dumber total da 383 candidatas e candidats han 274 ademplì las cundiziuns d'admissiun. Quai correspunda ad ina part da 71,5 pertschient da las scolaras e dals scolars ch'èn vegnids admess.
Ensemen cun ils examens d'admissiun al gimnasi, a la scola media commerziala e professiunala che han gì lieu il mars 2004 èn per l'emprima giada vegnidas realisadas per tut las partiziuns da scola media las restricziuns d'admissiun ch'èn vegnidas concludidas dal cussegl grond en il rom da l'examinaziun da las structuras e da las prestaziuns per sanar las finanzas dal chantun. Ils proxims examens d'admissiun sin basa da la procedura midada han lieu la primavaira 2005.

Gremi: uffizi per las scolas medias
Funtauna: rg uffizi per las scolas medias