La regenza ha suttamess a la consultaziun il project da la revisiun da la "lescha davart la banca chantunala grischuna" e da l'ordinaziun executiva respectiva. Essenzialmain sa tracti da dar a la banca la libertad d'agir necessaria da restituir il chapital da dotaziun al chantun, e quai sut tschertas cundiziuns e resguardond il tractament giuridicamain egual da tut las possessuras e possessurs da la banca. Il medem mument vegnan precisadas las reglas per in eventual augment da l'agen chapital. La consultaziun dura fin la fin d'avust. La regenza prevesa da suttametter questa fatschenta al cussegl grond la sessiun da favrer 2005.

Il project "segirezza" è terminà
La primavaira 2002 ha la regenza preschentà ils resultats dal project "segirezza d'edifizis publics e d'instituziuns publicas". Las mesiras da quel project en ils secturs "basa legala per rimnar e transmetter datas", "post da cussegliaziun central", "furmaziun supplementara ed infurmaziun" sco er "mesiras architectonicas" èn ussa realisadas. Fin la fin d'avust vegn er ad esser pront per l'acziun l'uschenumnà "care team grischun", in team da spezialistas e spezialists che cusseglia e gida persunas pertutgadas e lur confamigliars.

Ulteriuras plazzas per controllar il traffic da camiuns pesants
L'effectiv da la polizia chantunala grischuna vegn augmentà per nov plazzas; quellas èn deditgadas exclusivamain a la controlla dal traffic da camiuns pesants. Cun quai vul la regenza garantir tranter auter il manaschi da la plazza da controlla per il traffic da camiuns pesants a Riòlta sut.

CAA: in nov element central fin il pli tard l'onn 2006
La centrala d'alarm e d'acziuns (CAA) da la polizia chantunala grischuna duai vegnir equipada cun ina nova centrala operativa e duai il medem mument vegnir dischlocada. Per quest intent vul la regenza proponer al cussegl grond in credit d'impegn da totalmain ca. sis milliuns francs. Il mantegniment dal calculader directiv actual po vegnir garantì maximalmain fin la fin da l'onn 2006 e sto perquai vegnir remplazzà. La CAA retschaiva en emprima lingia ils telefons dals numers en cas d'urgenza 117 e 118.
La regenza ha scumpartì la dieschma d'alcohol da var 895'000 francs per l'onn da gestiun 2003. Quels daners vegnan duvrads per mesiras preventivas, per tractaments, per la perscrutaziun sco er per la scolaziun e furmaziun supplementara. Tenor la "lescha federala davart las bavrondas destilladas" sto vegnir duvrada la part dals chantuns dal retgav net da l'administraziun federala d'alcohol per il cumbat cunter l'alcoholissem en ses motivs e sias consequenzas sco er per il cumbat cunter l'abus da drogas, da narcotics e da medicaments.

Consultaziuns a la confederaziun
- Ordinaziun davart las prescripziuns minimalas per renconuscher curs da furmaziun e studis da diplom supplementar a scolas autas professiunalas (ordinaziun SAP): La regenza beneventa expressivamain in posiziunament pli ferm da las purschidas aifer la furmaziun professiunala superiura. In basegn da scleriment datti anc en il sectur da la finanziaziun e da la renconuschientscha dals diploms tras l'exteriur.
- Lescha federala davart il martgà intern: La regenza sustegna la reducziun da restricziuns chantunalas e communalas davart l'access al martgà. Uschia vegn impedì che burgaisas e burgais svizzers èn discriminads - sin basa da la cunvegna cun la UE davart la libra circulaziun da persunas - visavi a burgaisas e burgais da la UE. Certificats da qualificaziun per professiuns che fan part da la cunvegna davart la libra circulaziun da persunas, duain perquai vegnir accordads en il futur cun la procedura da renconuschientscha da la UE. La regenza n'è però betg perencletga cun il rinforzament da la funcziun da surveglianza da la cumissiun da concurrenza.
- Lescha federala davart ils identificaturs sectorials da persunas (lescha SPIN): La regenza favurisescha vinavant la soluziun d'in unic identificatur da persunas universal; en quest senn era la regenza gia s'exprimida l'onn 2003 en la consultaziun tar la "lescha federala davart l'armonisaziun dals registers dals abitants e d'auters registers uffizials da persunas". La soluziun proponida cun differents identificaturs da persunas per differents champs da la vita (identificaturs sectorials da persunas) n'è - cumparegli cun quai - nagina soluziun adattada. Perquai ch'ella maina en il sectur dals contacts da las burgaisas e dals burgais cun l'administraziun mo en moda limitada dapli effizienza e custs pli bass. La regenza propona a l'uffizi federal da statistica da tematisar e d'examinar seriusamain anc ina giada l'idea d'origin d'in identificatur da persunas universal.
- Revisiun parziala da l'assicuranza da malsauns (pachet 2: finanziaziun dals ospitals e "managed care"): La regenza refusa il project en questa versiun. Las disposiziuns centralas èn formuladas en moda massa averta e perquai n'èn las consequenzas finanzialas betg giuditgablas: La nova regulaziun sto integrar las entradas dals ospitals dal tractament da pazientas e pazients privats e mez-privats.

Da vischnancas e regiuns
- "Caricaru" er per la Surselva: Per las scolas primaras rumantschas da la Surselva vegn producì in nov med d'instrucziun. Latiers sa tracti d'ina nova ediziun dal "Caricaru" che vegn gia duvrà en il territori linguistic ladin sco cudesch da lectura.
- Bever: La regenza ha approvà la constituziun communala revedida. Las novaziuns concernan l'elegibladad e la demissiun da persunas d'uffizi.
- Domat: Per la nova construcziun da l'implant da sport Vial èn vegnids empermess ca. 470'000 francs.
- Cauco: Per l'amplificaziun dal provediment d'aua èn vegnids approvads ca. 57'000 francs.
- Trun: Per sanar ed engrondir l'implant da scola cun construir da nov ina scolina dubla ha la regenza approvà ina contribuziun chantunala da totalmain var 1,3 milliuns francs.
- Sta. Maria V.M.: Ca. 250'000 francs èn vegnids garantids a la vischnanca per las midadas da construcziun da la chasa da scola. Qua vegnan fusiunads ils stgalims superiurs da tut las vischnancas da la Val Müstair.
- Stussavgia: Per dischlocar la scolina en la chasa da scola ha la regenza concludì ina contribuziun da construcziun da ca. 33'000 francs.
- Arvigo: Per construir in nov access a la pendiculara Selma-Landarenca e per ulteriuras plazzas da parcar èn vegnids approvads ca. 290'000 francs.
- Lumbrein, Morissen, Vaz sut, Vella: La regenza ha approvà totalmain ca. 730'000 francs per projects consecutivs da las malauras da l'atun 2002: - dustanza per la Val Planezzas (Lumbrein); - dustanza per la Val Sura (Morissen); - dustanza per il Cosenzbach (Vaz sut); - dustanza per la Val Uaul Pign e per la Val Grava (Vella).
- Samedan: La vischnanca survegn 320'000 francs sco contribuziun chantunala per la renaturalisaziun dal curs da l'En en il rom d'in project da protecziun cunter auas grondas.
- "Challenge da las Alps per velo 2004": La regenza ha concedì la permissiun per ils trajects previs ils 21 e 22 d'avust: per il maraton da velo da Lantsch a Lai ed enavos, per il traject "challenge" da Lantsch sur ils pass da l'Alvra e dal Bernina, sur Livigno a Zernez e sur il pass dal Güglia a Lantsch sco er per il traject "classic" sur ils pass da l'Alvra e dal Güglia enavos al lieu da partenza.

Contribuziuns chantunalas a differentas instituziuns
- Promoziun da la cultura: La regenza ha approvà contribuziuns e garanzias da deficit en l'autezza da totalmain 95'000 francs. 17 ovras culturalas ed occurrenzas vegnan sustegnidas cun quels daners.
- Selvicultura 2004: Ca. 920'000 francs ha la regenza approvà per differents projects da selvicultura.
- Viafier retica: Cun la cumpra da la lingia da 66kV da Landquart a Küblis da la rezia energia (inclusiv l'indriz da distribuziun ed ils dretgs d'utilisaziun) cumplettescha la viafier retica ses provediment d'energia. Per quai ha la regenza approvà ina contribuziun chantunala da 835'000 francs; ca. 4,6 milliuns francs surpiglia la confederaziun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun