Sco gia l'onn 2004 ha la regenza fixà la quota da gulivaziun 2005
per vischnancas deblas da finanzas sin 84 pertschient. Per quai ha ella
deliberà ca. 14,5 milliuns francs.
La quota da gulivaziun gulivescha la forza fiscala relativa da las
vischnancas cun dretg da contribuziun fin ad 84 pertschient da la media
chantunala. Sco vischnancas deblas da finanzas valan las vischnancas da
las gruppas da forza finanziala quatter e tschintg. Il dretg da
contribuziun han vischnancas cun in pe da taglia communal d'almain 120
pertschient.
Nov splitting da taxas: las regiuns da muntogna vegnan pertutgadas
il pli fitg
L'uffizi federal da communicaziun vul examinar ils criteris per
calcular las contribuziuns als radios privats or dal pool da taxas da la
SRG SSR idée suisse. Il nov model tutga cunzunt las staziuns da radios
locals en las regiuns da muntogna. Anc avant che la nova lescha davart
radio e televisiun giaja en vigur, vul la confederaziun derscher ils
princips vertents da l'uschenumnà splitting da taxas che duai crear in
equiliber economic tranter las staziuns da radios locals en ils centers
d'aglomeraziun ed en las regiuns da muntogna. La regenza è s'engaschada
tar il departament federal per ambient, traffic, energia e communicaziun
per mantegnair la clav da repartiziun da fin uss.
Da vischnancas e regiuns
- Valendau, Versomi: Ils dus reviers forestals èn s'unids al "uffizi
forestal da revier Ruinaulta". La regenza ha approvà il statut
d'organisaziun.
- Maiavilla: Sin la via da Ragaz en direcziun da la Industriestrasse
vegn il traject entaifer il vitg prolungà per ca. 350 meters e la
sveltezza maximala reducida a 60 km/h.
- Novas constituziuns communalas: A Trin vegn il cussegl da scola
reducì da set a tschintg commembras u commembers ed a Langwies croda il
termin da carenza da trais mais per far diever dal dretg da votar. La
vischnanca dad Igis ha concludì ina constituziun communala cumplettamain
nova. La regenza ha approvà tuts trais projects.
- Novas leschas communalas: Zernez ha concludì ina nova "lescha
davart taxas da cura e davart contribuziuns per promover l'economia ed
il turissem", Flond ina revisiun totala da la "lescha communala da
taglia"; la regenza ha approvà domadus projects. A Flond va il nov
relasch en vigur immediatamain, a Zernez il 1. da schaner 2005.
Contribuziuns chantunalas a differentas instituziuns
- Malauras en Bangladesch: La regenza ha pajà 10'000 francs per
l'acziun d'agid da la caritas en favur da las unfrendas da las
inundaziuns.
- Medel/Lucmagn: Per l'engrondiment dal provediment d'aua ha la
regenza garantì al consorzi d'aua Curaglia ina contribuziun chantunala
da totalmain ca. 32'000 francs.
Consultaziuns a la confederaziun
- Uffizi federal da sanitad - "ordinaziun da victualias": Dapi il 1.
da schaner è la lescha davart la tecnica genetica en vigur. Cunquai
ch'igl èn pertutgadas er victualias, sto vegnir adattada l'ordinaziun da
victualias. Products cun organissems geneticamain modifitgads duain
esser caracterisads sco tals. Il transport e la magasinaziun dals
products cun organissems geneticamain modifitgads e cun organissems
convenziunals duain plinavant succeder en moda separada. La regenza
grischuna è da princip d'accord cun las finamiras dal nov project. Ella
renda dentant attent ch'igl existan en la UE sezza anc intschertezzas
davart l'execuziun da questas regulaziuns da caracterisaziun da la UE.
Projects da vias
- Via sursilvana: La regenza ha approvà il project en il territori
da Cuolm tranter Glion e Tavanasa. La punt d'ina lunghezza da ca. 100
meters duai vegnir remplazzada d'ina scarpa.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun