La documentaziun da la candidatura per admetter las lingias da
l'Alvra e dal Bernina da la viafier retica en la glista da la UNESCO
davart l'ierta culturala mundiala duai vegnir fatga sut la direcziun dal
chantun. Il chantun vegn a sustegnair la candidatura en moda logistica e
- sche necessari - er finanziala. La regenza grischuna ha infurmà
correspundentamain l'uffizi federal da cultura UFC davart sia prontezza.
Ultra da quai supplitgescha ella il UFC d'admetter la lingia da
l'Alvra e la lingia dal Bernina en l'uschenumnada "liste indicative".
Quella serva al cussegl federal en l'ultima instanza sco agid per pudair
decider, tge candidatura che duai vegnir suttamessa al center dal
patrimoni cultural mundial da la UNESCO a Paris.
La regenza parta dal fatg che la candidatura e pli tard er
in'eventuala admissiun da las lingias da la viafier retica en la glista
dal patrimoni cultural mundial da la UNESCO na vegnian betg ad esser
colliadas cun ulteriuras cundiziuns u proceduras legalas concernent la
protecziun e l'utilisaziun.
Nagins problems tar la dumonda dal lieu dal nov center dal
parc naziunal
Il lieu vegl dal center dal parc naziunal po er esser il nov: la
regenza na vesa ni impediments da la planisaziun directiva ni da la
tgira da monuments per stgarpar giu la veglia chasa dal parc naziunal e
da la remplazzar cun il nov project d'Olgiati. Quai ha ella confermà a
la cumissiun federala dal parc naziunal.
Las iniziantas ed ils iniziants han renunzià en il framtemp a l'idea
d'origin da construir il nov center dal parc naziunal en vischinanza
directa dal chastè da Planta-Wildenberg.
L'egualitad è e resta ina tema en il Grischun
La regenza ha acceptà sco petiziun l'uschenumnà "manifest da dunnas
dal Grischun". Cun quel sa dostan la centrala da dunnas dal Grischun ed
il plenum da dunnas dal Grischun sco er circa 500 consutsegnadras e
consutsegnaders cunter il "spargnem unilateral sin donn e cust da las
dunnas en noss chantun" en connex cun il project per sanar las las
finanzas dal chantun.
La regenza è persvasa ch'ins na po betg discurrer d'in "spargnem
unilateral", sch'ins metta questas singulas mesiras en il connex general
da tut las mesiras e dal volumen total da spargn dal project da
sanaziun. Er pervi da quai betg, perquai ch'il post da stab per dumondas
d'egualitad accelereschia la sensibilisaziun necessaria per questas
dumondas cun projects efficazis ed innovativs. Il post da stab è tuttina
vegnì incumbensà da rinforzar e da promover vinavant la conscienza per
l'egualitad da dunna ed um cun projects, referats, publicaziuns ed
ulteriuras mesiras.
Da vischnancas e regiuns
- Zuoz: La regenza ha approvà il project preliminar per il nov
stabiliment da scola Mareg ed empermess ina contribuziun chantunala da
construcziun da circa dus milliuns francs.
- Provediment d'aua: Circa 100'000 francs ha la regenza approvà
totalmain per sanar il provediment d'aua e per remplazzar
l'infrastructura da la fracziun San Niclà a Tschlin e per sanar ils
enchaschaments da las funtaunas Grosswiti e Tug da la vischnanca da
Cunter en il Partenz.
- Pasqual: La vischnanca survegn 184'000 francs sco contribuziun
chantunala per il project da dustanza en la Val Dusch. Il project è ina
consequenza da las malauras da l'atun 2002.
- San Murezzan: Per la via da colliaziun chantunala tranter
Champfèr, sin l'autezza da l'hotel "Primula" ed il cunfin communal da
San Murezzan / Schlarigna, vegn introducì in scumond da traffic per bus.
Il scumond da traffic è ina mesira dal nov concept da traffic per bus
turistics da la vischnanca da San Murezzan; da nov ston vegnir approvads
viadis da bus sin quest traject.
Chaussas persunalas
- Claudia Martina Röthlisberger-Semadeni che viva actualmain a
Langrickenbach daventa la manadra da la partiziun "dretg civil" dal nov
uffizi da polizia e da dretg civil a partir dal 1. da schaner 2005; sco
sia substituta è vegnida elegida Regina Just Brodbeck da Panaduz per il
1. d'october 2004.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun