Ils custs da l'assicuranza da malsauns per il sectur da tgira ston
vegnir stabilisads urgentamain. Tuttina na dastgan persunas che basegnan
tgira betg crudar en paupradad. Questa finamira dubla da la planisaziun
per refurmar l'assicuranza da malsauns vul il cussegl federal
cuntanscher cun dus differents models da finanziaziun. Els sa distinguan
en emprima lingia en la definiziun da las prestaziuns renconuschidas da
la cassa da malsauns.
L'idea fundamentala dal model A è che l'assicuranza da malsauns paja
totalmain ed exclusivamain per cas da tgira cumplexs. En situaziuns da
tgira simplas n'indemnisescha l'assicuranza da malsauns naginas
prestaziuns da tgira. Il model B distingua tranter la tgira acuta e la
tgira da lunga durada: tar la tgira acuta surpiglia l'assicuranza da
malsauns tut ils custs da las prestaziuns da tgira tenor lescha federala
davart l'assicuranza da malsauns; tar la tgira da lunga durada conceda
ella mo ina contribuziun. La cunfinaziun tranter tgira acuta e tgira da
lunga durada vegn fatga cun agid d'in criteri temporal.
La regenza grischuna refusa energicamain il model A. El n'è betg
adattà per la pratica ed ha flaivlezzas finanzialas e da la politica da
distribuziun. Il model B perencunter po la regenza sustegnair. La
regenza metta dentant differentas cundiziuns. La finanziaziun dals
ospitals e da la tgira na dastgan tut en tut betg chaschunar custs
supplementars per ils chantuns e per las vischnancas.
Sport da muntogna e da naiv: naginas contribuziuns da scolaziun pli
dal chantun
La regenza ha relaschà las novas disposiziuns executivas tar la
lescha davart il sport da muntogna e da naiv. Las participantas ed ils
participants dal curs che han absolvì cun success la scolaziun da sport
da naiv e da guid da muntogna na survegnan uschia naginas contribuziuns
dal chantun pli. Las finanzas dal chantun pon vegnir distgargiadas per
var 50'000 francs l'onn.
La revisiun da las disposiziuns executivas tar la lescha davart il
sport da muntogna e da naiv è ina mesira da l'examinaziun da la
structura e da las prestaziuns per sanar las finanzas dal chantun.
Da vischnancas e regiuns
- Stussavgia: La regenza ha approvà il plan per il svilup dal guaud.
Quel fixescha las finamiras e las strategias a lunga vista da la
cultivaziun dal guaud en Stussavgia.
- Sent: Tant la revisiun totala da la lescha davart la contribuziun
per promover il turissem sco er la revisiun totala da la lescha davart
las taxas da cura èn vegnidas approvadas. La nova lescha davart las
taxas da cura entra en vigur il 1. da december, il nov reglament davart
la contribuziun per promover il turissem il 1. da schaner 2005.
Contribuziuns chantunalas a differentas instituziuns
- Promoziun da la cultura: Per l'onn 2004 ha la regenza acceptà var
70 dumondas da contribuziun per intents culturals. La summa totala
importa var 380'000 francs.
Chaussas persunalas
- Sandra Felix, actualmain a Turitg, è vegnida elegida sco manadra
da project "nova gestiun publica NGP" tar il departament da finanzas e
militar, Thomas Engel, Cuira, sco collavuratur giuridic tar
l'administraziun da taglia.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun