La surveglianza dals martgads da finanzas vegn reglada cun ina nova
autoritad: la "surveglianza dals martgads da finanzas FINMA". Ella vegn
a s'engaschar per il renum da la Svizra sco plazza da finanzas e per la
stabilitad dal sistem da finanzas svizzer. En in emprim rapport parzial
ha ina cumissiun d'experts proponì da concepir la FINMA sco instituziun
da dretg public e - per il mument - da manar ensemen organisatoriamain
en quella la cumissiun federala da bancas e l'uffizi federal da las
assicuranzas privatas. La regenza grischuna è s'exprimida en moda
positiva davart il sboz da consultaziun. La nova structura è
raschunaivla e maina a la finamira, perquai che cumpetenzas
professiunalas vegnan colliadas, duplicitads sminuidas e largias da
surveglianza eliminadas.
Reglà da nov la cunvegna da tariffa tranter la federaziun da spitex
dal Grischun e la santésuisse
La regenza grischuna ha approvà la cunvegna da tariffas tranter la
federaziun da spitex dal Grischun e la santésuisse. La pauschala da
tgira per ura vegn da nov auzada per dus francs; tut tenor stgalim da
prestaziun importa ella uss tranter 42 e 57 francs. Per las persunas
assicuradas chaschuna questa adattaziun in augment effectiv da la premia
da var 0,1 pertschient.
Concludì ils princips da la repartiziun dal contingent
La regenza ha concludì ils princips per la repartiziun dal
contingent per l'onn 2004 ed ha approvà las quotas da las vischnancas
per l'acquist da bains immobigliars tras persunas a l'exteriur. Per
l'onn 2004 stattan a disposiziun al chantun Grischun sco enfin uss
totalmain 270 contingents.
Da vischnancas e regiuns
- Mastrils: La regenza ha approvà la nova constituziun communala.
- Tujetsch, Vaz, Zizers: En il vitg da Tschamut vala da nov ina
spertadad maximala generala da 50 km/h (fin uss 60 km/h), medemamain en
la fracziun da Lain, nua ch'il traject da 50 km/h entaifer il vitg vegn
spustà per var 200 meters en direcziun da Muldain. Ultra da quai vegn
introducida da Lain en direcziun da Lai in'avantzona da 60 km/h d'ina
lunghezza da var 500 meters. Sin la via tudestga tranter Zizers e
Trimmis vegn reducida la spertadad maximala dad 80 sin 60 km/h en il
territori da la cruschada "Rappengugg" sin in traject da var 400 meters.
- Auzà il pais maximal: Sin la via da Spina tranter Glaris e Spina è
il pais maximal per vehichels da 18 resp. 9 tonnas vegnì auzà sin 28
tonnas e sin la via da Sursaissa tranter il Grosstobel e S. Martin da 13
sin 18 tonnas. Fin a la terminaziun da las lavurs da sanaziun sin la via
da Sursaissa vala la tonnascha pli auta temporarmain mo durant ils mais
da matg fin october.
Contribuziuns chantunalas a differentas instituziuns
- Chasa d'attempads e da tgira Falveng, Domat: La contribuziun
chantunala per la midada da construcziun, l'engrondiment e la sanaziun
da l'edifizi importa var 1,7 milliuns francs. La regenza aveva approvà
il project preliminar gia la stad passada.
- Fundaziun movingAlps: Il chantun Grischun sa participescha vi dal
chapital da basa da la fundaziun cun ina contribuziun unica da 10'000
francs; movingAlps sustegna il svilup economic e cultural da vitgs e
valladas periclitadas en las Alps.
Projects da vias
- Punt da la Rabiusa a Passugg, punt da la Landquart a Serneus: Per
reparar domaduas punts ha la regenza approvà var 1,2 milliuns francs.
Chaussas persunalas
- Bruno Roussette da Vicosoprano è vegnì elegì sco inschigner
forestal regiunal da la regiun Grischun central/Moesano. El cumenza sia
plazza il 1. d'avrigl.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun