A chaschun da sia sesida dals 14 da settember 2004 ha la regenza instradà da nov la projectaziun da localitads necessarias per la scola chantunala grischuna. En quest connex resguarda ella la decisiun dal suveran dals 16 da matg 2004 cun la refusa dal project dal campus. La regenza persequitescha però er cun cundiziuns da basa modifitgadas la finamira da metter a disposiziun per la scolaziun da las scolaras e dals scolars da la scola chantunala a Cuira ina infrastructura moderna che satisfa als standards minimals da las scolas medias da la Svizra. La projectaziun ha finalmain da prender resguard sin in' amplificaziun e cumplettaziun dals edifizis existents ch'è pussaivla pli tard. Cun la sanaziun dals edifizis existents collia la regenza las cundiziuns che las directivas da las leschas areguard ils basegns da persunas impedidas, la problematica dal PCB e la segirtad cunter terratrembels sco er las pretensiuns d'ina moda da construcziun persistenta ston vegnir resguardadas stringentamain.
Il medem mument duai il manaschi da scola vegnir mantegnì sche pussaivel senza disturbis. Cun la decisiun da princip da persequitar ussa il project da sanaziun en etappas è finalmain colliada ina reducziun dal program da spazi. Resguardond questas cundiziuns da basa vegn la planisaziun da la sanaziun da la scola chantunala sin la Halde instradada immediatamain cun la finamira da pudair cumenzar cun la realisaziun la stad 2007. Parallelamain tar quai duai la planisaziun da la sanaziun dals implants da sport al liber Sand vegnir preparada. La sanaziun da l'anteriur seminari da magisters po pir succeder, cura che la sanaziun da la scola chantunala sin la Halde è terminada, cunquai ch'igl è previs da pudair savair duvrar ils medems provisoris. In edifizi da cumplettaziun necessari duai pir vegnir planisà, cura che las enconuschientschas davart il futur da la scola chantunala èn consolidadas.

Gremi: departament da construcziun, traffic e selvicultura
Funtauna: rg departament da construcziun, traffic e selvicultura