La revisiun da la lescha da vischnancas dal chantun Grischun va en consultaziun. Las novaziuns las pli impurtantas èn tranter auter:
- il champ d'applicaziun e l'intent da la lescha, l'autonomia communala e las incumbensas da las vischnancas,
- la cumposiziun da la suprastanza communala,
- la contabilitad da las vischnancas,
- la collavuraziun intercommunala,
- la fusiun da vischnancas e
- la surveglianza da la regenza.
Il motiv principal per questa revisiun parziala èn las directivas da la nova constituziun chantunala davart la classificaziun dal chantun ("vischnancas e collavuraziun intercommunala" resp. "circuls, districts e corporaziuns regiunalas"); la lescha da vischnancas revedida creescha la basa per la reorganisaziun da las corporaziuns regiunalas e per la fusiun da vischnancs. Ultra da quai vegnan proponidas ulteriuras midadas ch'èn resultadas spezialmain da la pratica. La lescha da vischnancas dal chantun Grischun ch'è valaivla oz datescha da l'onn 1974.
La consultaziun dura fin la fin da mars 2005. Ils documents da consultaziun pon vegnir consultads sut www.div.gr.ch > Mitteilungen und Projekte > Projekte.

Vischnancas dal Grischun: la voluntad da fusiunar vegn remunerada en l'avegnir
Cun la revisiun da la lescha davart la gulivaziun da finanzas intercommunala vul la regenza rinforzar en duas etappas l'attractivitad da fusiunar vischnancas . Il rapport correspundent davart la revisiun parziala da la "lescha davart la gulivaziun da finanzas intercommunala e da la promoziun da fusiuns da vischnancas" ha ella ussa tramess en consultaziun. En in emprim pass propona la regenza in nov modell per la gulivaziun da la forza fiscala ed ina nova regulaziun en connex cun la resalva persunala per contribuziuns ad ovras publicas.
Il nov modell per la gulivaziun da la forza fiscala prevesa da garantir a tut las vischnancas ina gulivaziun minimala da la forza fiscala; questa contribuziun da basa importa independentamain dal dumber d'abitantas e d'abitants 55 fin 60 pertschient da la media chantunala. Per vischnancas cun passa 300 abitantas ed abitants po la forza fiscala relativa vegnir gulivada supplementarmain sin 75 fin 100 pertschient da la media chantunala; per vischnancas cun damain che 300 abitantas ed abitants vegn quest import percunter reducì. Per vischnancas fusiunadas vegn ultra da quai schluccada la limita d'abitantas e d'abitants da 300 persunas per in termin transitori da 20 onns.
Da nov na duai la resalva persunala per contribuziuns ad ovras publicas betg pli esser dependenta dal dumber d'abitantas e d'abitants (400 francs per persuna), mabain importar en general 100'000 francs. Quest import correspunda ad ina vischnanca da 250 abitantas ed abitants.
La consultaziun dal rapport dura fin la fin da mars 2005. Ils documents da consultaziun pon vegnir consultads sut www.div.gr.ch > Mitteilungen und Projekte > Projekte.

Chaussas persunalas
- David Willi da Cuira è vegnì elegì per il 1. da matg 2005 sco inquisitur tar la procura publica dal Grischnun.

Per la fin da l'onn
La regenza grischuna ha fatg 44 sesidas durant l'onn 2004. A chaschun da quellas ha ella prendì 1883 conclus (l'onn precedent: 1882). Il presidi da la regenza surpiglia a partir dal 1. da schaner 2005 Eveline Widmer-Schlumpf, scheffa dal departament da finanzas e militar. Vicepresident daventa cusseglier guvernativ C. Lardi, schef dal departament d'educaziun, cultura e protecziun da l'ambient.
La regenza giavischa a tut las burgaisas ed a tut ils burgais per la fin da l'onn tut il bun, speranza e prosperitad.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun