La partenza per introducir il rumantsch grischun (RG) en la scola
populara grischuna vegn fatga - tenor la voluntad da la regenza - cun la
fasa "RG passiv". Ultra da l'instrucziun en l'idiom han lieu en questa
fasa emprims inscunters cun il rumantsch grischun en ina furma passiva.
En quest connex vegn promovida cunzunt la chapientscha dal RG. En las
vischnancas da la Val Müstair, che han concludì sco emprima regiun
d'introducir il RG en scola, vegn applitgà il "RG passiv" gia a partir
da l'onn da scola 2005/2006. Là duain alura er vegnir utilisadas
materialias d'instrucziun en RG a partir dal segund semester da scola.
La regenza ha approvà il concept da meds d'instrucziun correspundent
ch'è vegnì elavurà d'in team da project. I vegn quintà cun expensas da
154'000 francs. La fasa "RG passiv" vala sco fasa preparatoria per
l'introducziun integrala dal rumantsch grischun.
Fixà las contribuziuns chantunalas ad instituziuns per l'integraziun
da persunas creschidas cun impediments per l'onn 2006
La regenza ha fixà las contribuziuns chantunalas ad instituziuns per
l'integraziun professiunala e sociala da persunas creschidas cun
impediments per l'onn 2006. Pertutgads èn lavuratoris, chasas da dimora
e centers da di. Per fixar las contribuziuns è decisiv tranter auter il
dumber da plazzas fixà en la planisaziun dal basegn. Ulteriurs criteris
èn il grad da l'inabilitad da las abitantas e dals abitants da gidar
sasezs, il surpli d'expensas imputabel da las instituziuns e la
prontezza da las instituziuns da metter a disposiziun a l'uffizi
chantunal dal servetsch social las datas necessarias per calcular la
contribuziun chantunala. Las contribuziuns vegnan regladas da nov pervi
dals plans da spargnar da la confederaziun e dal chantun.
La regenza dat glisch verda per il project "spazis cun pauc
potenzial - strategia da svilup dal Grischun"
Per realisar il project "spazis cun pauc potenzial - strategia da
svilup dal Grischun" ha la regenza deliberà ina contribuziun da 100'000
francs. La contribuziun vegn concedida sut la premissa che la
confederaziun sa participeschia cun almain 50 pertschient vi dals custs
totals da 200'000 francs per l'emprima fasa da project. I sa tracta d'in
project en il rom da la nova politica regiunala da la confederaziun
(NPR).
Da vischnancas e regiuns
Domat: La regenza approvescha il project da construcziun per la nova
halla da sport "Vial". Sin basa da la lescha da scola e dals princips da
subvenziun vegn concedida ina contribuziun chantunala maximala da
437'000 francs per quest intent. Quai correspunda a 17,5 pertschient
dals custs imputabels.
Malans: La revisiun parziala dal plan general d'avertura 1:2000
"Karlihof" na vegn betg approvà perquai ch'in recurs è vegnì acceptà.
Tschierv: La regenza approvescha plirs plans da zonas e plans
generals da furmaziun.
Contribuziuns chantunalas a differentas instituziuns
Musica da giuvenils Cuira: A la musica da giuvenils conceda la
regenza ina contribuziun da maximalmain 6500 francs per
l'instrumentaziun parziala.
Promoziun da l'integraziun: La regenza conceda ina contribuziun da
totalmain 43'000 francs per projects per integrar persunas estras.
Projects da vias
La regenza ha approvà ulteriurs 571'000 francs per il sviament da
Flem.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun