Navigation

Inhaltsbereich

  • Erste Mitteilung
  • Neuen Beitrag einfügen
La catastrofa da malaura dals ultims dis ha chaschunà donns immens en grondas parts da la Svizra ed ha gì la consequenza che umans han pers lur vita u èn sparids e vegnan anc adina manchentads. La regenza condolescha a las relaschadas ed als relaschads e lascha savair tut las persunas pertutgadas ch'ella prendia part da lur situaziun.
La regenza è sa procurada ina survista dals donns en il chantun Grischun. Extraordinarias èn la vehemenza e l'intensitad dals cas da donn e la dimensiun dals donns. Als territoris pertutgads ed a lur populaziun garantescha ella solidaritad e sustegn cumplain. Gronda impressiun fan l'engaschament e las prestaziuns da las forzas d'acziun e d'agid. Sut cundiziuns fitg difficilas e per part isoladas dal mund exteriur han ellas - en lavur nuninterruta e senza pausa - evacuà persunas periclitadas, instradà mesiras da segirezza, limità sche pussaivel la dimensiun dals donns ed instradà là, nua ch'igl aveva gia dà donns, las lavurs da rumida. A las acziuns correspundentas en las vischnancas pertutgadas eran participads spezialmain appartegnentas ed appartegnents dals pumpiers, da la polizia, da la sanitad, da la protecziun civila, dals servetschs tecnics, forestals e stradals e plinavant bleras voluntarias e blers voluntaris. La regenza engrazia a tut las forzas d'acziun dal chantun, da las vischnancas e da terzas organisaziuns sco er a tut las autras persunas participadas per lur engaschament exemplar e curaschus en il rom da la catastrofa da malaura. En sias proximas sesidas vegn ella a decider co ed en tge furma ch'il chantun po - ultra da quai ch'è gia vegnì prestà - dar sustegn als umans ed a las instituziuns pertutgadas en moda nuncumplitgada.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel