La data dals 9 da settember na duai betg pli esser stringentamain il
emprim di da chatscha. Quai è ina da las midadas las pli impurtantas che
ina revisiun parziala da la lescha chantunala da chatscha e da
l'ordinaziun chantunala da chatscha chaschuna. La regenza ha rectifitgà
il project sin fundament dals resultats da la procedura da consultaziun
ed ha deliberà el per mauns dal cussegl grond. Da nov duai la chatscha
auta ordinaria avair lieu durant il temp dal 1. fin ils 30 da settember
e durar maximalmain 21 dis. La lescha cuntegna qua la pussaivladad da
far ina interrupziun da la chatscha d'almain trais dis successivs.
Questa regulaziun porscha ina flexibilitad maximala per fixar il termin
dal cumenzament da la chatscha auta. Ella dat la pussaivladad d'empruvar
differentas soluziuns per augmentar en la pratica la preda da la
chatscha auta. Cun concepir correspundentamain las prescripziuns da
chatscha pon vegnir evitads - grazia a questa regulaziun - er ils
conflicts cun il temp da chalira dals tschiervs. Il cumenzament, la fin
ed ina eventuala interrupziun da la chatscha vegnan mintgamai
communitgads a temp util da la regenza, per che las chatschaduras ed ils
chatschadurs possian planisar lur vacanzas. I n'è betg pli previs da
reprender la chatscha auta la fin d'atun, dentant vegn mantegnida la
chatscha speziala.
La lescha chantunala da chatscha e l'ordinaziun chantunala da
chatscha duain dentant vegnir revedidas er en auters puncts. La
vegliadetgna minimala per ir a chatscha vegn reducida da 20 a 19 onns e
la vegliadetgna minimala per s'annunziar a l'examen da qualificaziun a
18 onns. Plinavant vegnan ils motivs per la refusa da la patenta da
chatscha limitads essenzialmain a fatgs che stattan en connex cun l'ir a
chatscha. Da nov vegnan las chatschaduras ed ils chatschadurs er
obligads da regular lur armas mintgamai avant il cumenzament da la
chatscha. Qua po la regenza ordinar che las chatschaduras ed ils
chatschadurs ston appurtar ina cumprova davart l'obligaziun da tir
ademplida. In'ulteriura novaziun è la liberaziun da chatschaduras e da
chatschadurs d'ordaifer da l'examen d'armas e da tir chantunal. Questa
liberaziun datti dentant mo sut la premissa che las chatschaduras ed ils
chatschadurs d'ordaifer hajan reussì - en Svizra u a l'exteriur - in
examen da tir equivalent a las pretensiuns dal chantun Grischun.
Il regal da chatscha duai purtar - tenor il dretg vertent - in
retgav net adequat. Questa disposiziun vegn adattada a las cundiziuns
actualas. Da nov sto il retgav da las taxas per la patenta e da las
taxas da prelevaziun sco er da las ulteriuras entradas da la chatscha
cuvrir almain ils custs dals organs da chatscha. Las incumbensas da
l'uffizi da chatscha e pestga che vegnan furnidas en l'interess da la
generalitad na dastgan pia betg pli vegnir finanziadas cun augmentar las
taxas per la patenta da chatscha e las taxas da prelevaziun.
L'indemnisaziun da questas incumbensas sco per exempel la bunificaziun
per donns d'animals da rapina gronds sto vegnir garantida cun autras
funtaunas da finanziaziun. In'ulteriura novaziun pertutga las taxas per
la patenta da chatschaduras e da chatschadurs d'ordaifer. Per questas
taxas vegn fixada ina tariffa minimala ed ina tariffa maximala en la
lescha. A l'intern da questa dimensiun fixescha la regenza l'import da
las taxas per la patenta.
Gremi: regenza
Funtauna: rg chanzlia chantunala dal Grischun