Ils proxims dis sa scuntra la regenza gist duas giadas cun regenzas amias. Ils 6 da settember è la regenza dal principadi da Liechtenstein en visita, ils 7 da settember la regenza da la provinza autonoma da Bulsaun-Tirol dal sid.
La delegaziun dal principadi da Liechtenstein vegn manada dal schef da la regenza Otmar Hasler. Ella consista dal substitut dal schef da la regenza Klaus Tschütscher, da la cussegliera guvernativa Rita Kieber-Beck, dal cusseglier guvernativ Hugo Quaderer e dal cusseglier guvernativ Martin Meyer. Tar la delegaziun tutga plinavant il secretari da la regenza Norbert Hemmerle. La regenza grischuna - manada da la presidenta da la regenza Eveline Widmer-Schlumpf - vegn ad esser preschenta cumplettamain.
La delegaziun da la provinza autonoma da Bulsaun-Tirol dal sid vegn manada dal guvernatur Luis Durnwalder. Ella consista da la substituta dal guvernatur Luisa Gnecchi, dals deputads Hans Berger, Luigi Cigolla, Werner Frick, Michl Laimer, Florian Mussner, Richard Theiner e Thomas Widmann. Plinavant fan part da la delegaziun er il directur general Adolf Auckentaler, il schef da cabinet Klaus Luther ed il manader da partiziun Karl Rainer. La regenza grischuna vegn ad esser preschenta cumplettamain.
Domaduas visitas servan en emprima lingia a la tgira da las relaziuns amicablas ed al barat d'experientschas sin ils champs da la cultura, da l'economia e da la politica. La relaziun vicendaivla è caracterisada d'ina enclegientscha excellenta.

Gremi: regenza
Funtauna: rg chanzlia chantunala dal Grischun