Dumengia, ils 21 da matg 2006, han lieu previsiblamain las elecziuns cirquitalas per la perioda d'uffizi 2006 - 2010. En vista a quellas ha la regenza repartì ils 120 mandats dal cussegl grond sin ils 39 circuls.
Il circul da Cuira ed il circul dals Tschintg Vitgs vegnan a survegnir en la perioda d'uffizi 2006 - 2010 mintgamai in mandat supplementar en il cussegl grond. Il circul da Cuira ha pia en avegnir 20 commembras e commembers en il cussegl grond, il circul dals Tschintg Vitgs indesch. Percunter ston il circul da Claustra ed il circul dal Scanvetg mintgamai renunziar ad in mandat. Quests dus circuls vegnan ad avair en avegnir anc dus deputadas u deputads. Tut ils auters circuls vegnan a delegar a Cuira a partir dal 2006 il medem dumber da commembras e da commembers dal parlament.
Per la repartiziun dals mandats dal cussegl grond sin ils circuls è decisiva la statistica federala da l'effectiv annual da la populaziun (ESPOP) che vegn publitgada mintgamai in onn avant las elecziuns cirquitalas. La basa per las elecziuns cirquitalas 2006 è la ESPOP 2004 che mussa il dumber da la populaziun svizra residenta da la fin da december 2004.
La procedura da repartiziun sa drizza tenor l'art. 3 da la lescha davart la represchentanza dals circuls en il cussegl grond dal chantun Grischun. Davart la repartiziun dals mandats dal cussegl grond sin ils singuls circuls pon ins prender invista en l'internet qua.

Gremi: regenza
Funtauna: rg chanzlia chantunala dal Grischun