Il Grischun ha fatg ses pensums en connex cun la realisaziun da la porta alpina. Questa emna ha la regenza grischuna inoltrà a Berna ils documents supplementars ch'il cussegl federal ha pretendì. Quels dovra il cussegl federal sco basa da decisiun per respunder la dumonda da confinanziaziun che la regenza aveva inoltrà ils 21 da december 2004. La fin da zercladur aveva il cussegl federal da princip sustegnì il project, ma pretendì il medem mument dal chantun Grischun in concept che contempla en moda cumplessiva las consequenzas territorialas ed economicas da la porta alpina per tut il territori dal Gottard. Tar ils documents ch'èn vegnids inoltrads uss tutga tranter auter er il rapport "concept dal territori per il Gottard". Quel mussa tratgs pussaivels per in svilup persistent da la regiun dal Gottard. Ils resultats da l'enquista ch'il chantun Grischun ha fatg tar las regiuns, tar las vischnancas, tar acturas localas e tar acturs locals dal territori dal Gottard èn medemamain vegnids integrads en il rapport.

Da vischnancas e regiuns
- Duvin: La regenza garantescha a la vischnanca da Duvin ina contribuziun da 50'455 francs als custs cun dretg da contribuziun per differentas mesiras da renovaziun e da cumplettaziun dal stabiliment dal provediment d'aua.
- Jenaz: La constituziun dal circul da Jenaz vegn approvada.
- Riein: A la vischnanca da Riein vegnan concedids 169'434 francs als custs cun dretg da contribuziun per engrondir il stabiliment dal provediment d'aua.
- Vaz sut: La revisiun parziala da la lescha da construcziun che la radunanza communala ha deliberà ils 31 da mars 2005 vegn approvada.
- Zernez: La regenza approvescha differents projects da planisaziun en connex cun il nov center dal parc naziunal planisà a Zernez. En spezial vegnan approvads la revisiun parziala da la lescha da construcziun (conturn "chastè da Planta-Wildenberg"), il plan da zonas correspundent, il plan general da furmaziun ed il plan general d'avertura.

Contribuziuns chantunalas a differentas instituziuns
- Corporaziun regiunala Val Müstair: A la corporaziun regiunala Val Müstair, che consista da las sis vischnancas da Fuldera, Lü, Müstair, Sta. Maria V.M., Tschierv e Valchava, garantescha la regenza ina contribuziun da maximalmain 2'600'000 francs or dal fond da gulivaziun intercommunala vi dals custs per sanar, midar ed engrondir l'ospital da la Val Müstair. Resalvada resta la concessiun dals credits necessaris tras il cussegl grond.
- Promoziun da la cultura: La regenza ha concedì 135'000 francs sco contribuziuns e sco garanzias da deficit per 22 ovras ed occurrenzas culturalas.
- Associaziun da chascharia Spleia: Per realisar la segunda etappa da la sanaziun da la chascharia a Spleia conceda la regenza duas contribuziuns chantunalas da totalmain 281'100 francs.

Projects da vias
La regenza ha approvà 1'748'000 francs per sanar la via sursilvana a Tumein cunter la canera.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun