La regenza ha fixà las tariffas maximalas per abitantas ed abitants da chasas da tgira per l'onn 2006. Las novas tariffas restan en general en il rom actual ed importan tut tenor il stgalim da tgira tranter 115 francs e 190 francs per di da tgira ed abitanta u abitant. Questas tariffas valan per las chasas da tgira che vegnan sustegnidas dal chantun cun contribuziuns.

Da vischnancas e regiuns
- Stussavgia: Per engrondir e renovar il stabiliment dal provediment d'aua approvescha la regenza ina contribuziun maximala da 127'800 francs. Quai èn maximalmain 20 pertschient dals custs imputabels.
- Tusaun: La regenza approvescha la revisiun parziala da la lescha da construcziun sco er il plan da zonas 1:1'000 "zona dal restaurant a l'autostrada".
- Bravuogn: Il plan da zonas e plan general da furmaziun 1:2'000 Val S-chigra vegn approvà.
- La Punt-Chamues-ch: La regenza approvescha l'indriz dal register funsil federal concernent differents bains immobigliars en la vischnanca.

Contribuziuns chantunalas a differentas instituziuns
- Museums grischuns: La federaziun da tetg dals museums grischuns survegn mintgamai 50'000 francs per sias activitads dals onns 2006 e 2007.
- Fond da sport: Per la participaziun da federaziuns grischunas da sport a las occurrenzas da sport da la cuminanza da lavur da las regiuns alpinas (ARGE ALP) conceda la regenza maximalmain 7'000 francs or dal fond da sport.

Projects da vias
La regenza ha approvà totalmain 1'278'000 francs per installaziuns electricas, per construir e per sanar ils suandants trajects da via:
- via sursilvana: sviament da Flem
- Trimmis: via da Trimmis (en il vitg), traject plazza - banca chantunala

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun