Quest mars ha la vischnanca da Puschlav surdà a la polizia chantunala las incumbensas da la polizia en il vitg. Oz gievgia è quest nov model da collavuraziun er vegnì confermà formalmain: Il cusseglier guvernativ Martin Schmid, schef dal departament da giustia, polizia e sanitad, ed il president communal Tino Zanetti han suttascrit il contract correspundent a Puschlav. La regenza aveva approvà la cunvegna correspundenta tranter Puschlav ed il chantun la primavaira retroactivamain per il 1. da schaner 2005.
Per la lavur da polizia che vegn prestada dal chantun paja la vischnanca da Puschlav ina contribuziun da 75'000 francs per onn. Cun questa contribuziun ha er pudì vegnir augmentà il dumber da persunal dal post da la polizia chantunala a Puschlav. En in concept ha ina gruppa da lavur elavurà ils princips per las incumbensas da la polizia communala che vegnan ademplidas da la polizia chantunala. Quest project da pilot a Puschlav dura dus onns e po vegnir transferì pli tard er sin autras vischnancas. La delegaziun d'incumbensas da la polizia communala a la polizia chantunala è daventada pussaivla pir tras il relasch da la nova lescha da polizia l'october 2004.

Foto Vertragsunterzeichnung

Persunas che dattan infurmaziuns:
cusseglier guvernativ Martin Schmid, schef dal departament da giustia, polizia e sanitad, tel. 081 257 25 01
president communal Tino Zanetti, tel. 081 839 03 00

Gremi: regenza
Funtauna: rg chanzlia chantunala dal Grischun