Stimadas dunnas e stimads signurs
Davart la raschun, pertge ch'ils totalmain 16 giasts ollandais èn daventads malsauns mesemna saira en in hotel a Tschiertschen po vegnir ditg il suandant:

Examinaziun
En il manaschi pertutgà èn la notg da l'ospitalisaziun da las pazientas e dals pazients er vegnids mess en segirezza rests da la suppa da bulieus che quellas persunas avevan mangià. Quella suppa cuntegneva bulieus indigens setgentads. Sin fundament dals emprims simptoms da las pazientas e dals pazients e dal temp da latenza curt da la malsogna stuevan ins partir il cumenzament dal fatg ch'i sa tractia d'ina intoxicaziun greva da bulieus. La suppa messa en salv è vegnida examinada d'ina controlladra da bulieus uffiziala cun experientscha sin bulieus esters toxics, e quai gia durant l'ospitalisaziun da las pazientas e dals pazients.

Il resultat
Bulieus esters toxics n'han pudì vegnir cumprovads nagins. La diagnosa clinica da l'ospital chantunal na mussa er nagina intoxicaziun da bulieus. L'andament da la malsogna rinviescha ad ina intoxicaziun da victualias. En la suppa da bulieus han pudì vegnir cumprovads bulieus ch'èn stads fermamain mifs. Bulieus daventan mifs en spezial, sch'els vegnan conservads memia ditg ed en moda faussa (p.ex. en satgs da plastic). Il gener da la miffa n'ha dentant betg pli pudì vegnir eruì. Sin basa dals fatgs avant maun sto vegnir constatà en quest connex ch'i sa tracta tar quest cas d'ina intoxicaziun da victualias e betg d'ina intoxicaziun da bulieus.

Facit
Ils posts cumpetents han agì en moda fitg prudenta. La suppa da bulieus mangiada è vegnida examinada il medem mument sco l'ospitalisaziun da las pazientas e dals pazients. Pervi da quai ha pudì vegnir exclusa fitg svelt ina intoxicaziun da bulieus. La polizia chantunala, l'ospital chantunal e l'uffizi per la segirezza da victualias e per la sanadad d'animals han collavurà en moda professiunala. Ch'ina controlladra da bulieus uffiziala era stada immediatamain disponibla ha pudì dar rinviaments impurtants davart la causa da la malsogna da las pazientas e dals pazients. Quest cas mussa che la controlla uffiziala da bulieus sto esser - malgrà la liberalisaziun da la lescha da victualias - ina part impurtanta da l'obligaziun dals manaschis d'avair quità (autocontrolla).

Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals