Il purtader dal premi grischun da cultura 2005 ha num Iso Camartin. La regenza grischuna undrescha las excellentes prestaziuns da Camartin sco essaist e sco criticher da litteratura che al han rendidas enconuschent lunsch sur ils cunfins svizzers or. Ultra da quai vegnan renconuschids ils merits dal professer da lingua per la litteratura e per la cultura rumantscha. Il premì è dotà cun 20'000 francs.
In premi da renconuschientscha en l'autezza da 10'000 francs ha la regenza attribuì ad Ursula Brunold-Bigler, a Hans Danuser, a Lucia Degonda, ad Anita Gordon, a Hans Schmid, ad Urs Simeon, a Gion Tscharner ed a Philipp Walther. Ursula Brunold-Bigler survegn il premi per sia perscrutaziun en il sectur da l'etnologia, da l'istorgia culturala e da l'istorgia sociala da las paraulas e da la ditgas. Hans Danuser vegn undrà per sias prestaziuns extraordinarias sco perscrutader da l'istorgia locala dad Arosa e dal Scanvetg sco er da las vias istoricas. Dal puntg da vista da la regenza ha Lucia Degonda merità quest premi cun sias lavurs fotograficas. Anita Gordon e Philipp Walther survegnan premis da renconuschientscha per lur prestaziuns extraordinarias per il mantegniment dal rumantsch, en spezial dal puter. Hans Schmid vegn undrà cun in premi en renconuschientscha per esser s'occupà durant decennis cun la pictura. Urs Simeon dirigia cun success divers chors ed è ultra da quai activ sco pedagog da musica. E Gion Tscharner ha fatg grondas prestaziuns sin il champ da la linguistica e da la litteratura rumantscha.
In premi da promoziun da 7000 francs survegnan: Walter Abderhalden, scienzà da la natira, Ingrid Alexandre, chantadura, Rilana Cadruvi, chantadura, Anna-Lydia Florin, producenta da films, Gian Paolo Giudicetti, linguist e litterat, Corinne L. Rusch, artista figurativa, Luca Sisera, musicist, e Fabia Zindel, creadra da textilias. La surdada dals premis succeda en il rom d'ina festa modesta che ha lieu venderdi, ils 18 da november, a las 17.15 en la sala dal cussegl grond a Cuira.

La regenza prenda ina regulaziun transitoria per las ovras dal Partenz
La regenza ha prendì ina regulaziun transitoria per che las ovras dal Partenz da la rezia energia Claustra possian vegnir manadas vinavant. Ina tala è daventada necessaria suenter che la regenza aveva dà il december 2004 l'approvaziun da la concessiun e dal project per cuntinuar cun il manaschi da las ovras dal Partenz, e suenter che quella decisiun era dentant vegnida contestada da numerusas vischnancas. La regulaziun transitoria vala fin ch'ina decisiun cun vigur legala è avant maun, respectivamain fin maximalmain ils 31 da december 2007.

Deliberà la missiva per abolir il concordat davart la scola auta ed il center da furmaziun professiunala a Wädenswil
La regenza ha deliberà la missiva per abolir il concordat davart la scola auta ed il center da furmaziun professiunala a Wädenswil per mauns dal cussegl grond. Ils chantuns purtaders ed il principadi da Liechtenstein èn stads la fin da l'onn 2004 unanimain da l'avis d'abolir il concordat e da transferir sias purschidas e sias activitads en il champ da cumpetenzas dal chantun Turitg. A Wädenswil vegnan tranter auter purschids studis sco biotecnologia, tecnologia da victualias, inschigneria da l'ambient e facility management.

La regenza approvescha la cunvegna davart l'agid d'investiziun cun la viafier Matterhorn Gottard
La regenza approvescha il sboz da la quarta cunvegna davart l'agid d'investiziun cun la viafier Matterhorn Gottard (MGB). Tenor l'ordinaziun vertenta davart las parts chantunalas a las indemnisaziuns per ils agids finanzials per il traffic regiunal sco er tenor la clav da repartiziun interchantunala tutgan 735'490 francs al chantun Grischun.

La lescha davart l'adattaziun da conclus e da disposiziuns da participaziun entra en vigur
La regenza ha concludì da metter en vigur per il 1. da november 2005 la lescha davart l'adattaziun da conclus da participaziun vi da concordats e vi da cunvegnas a la constituziun chantunala ch'è vegnida relaschada dal cussegl grond ils 18 da zercladur 2005. Il termin da referendum è scadì ils 21 da settember 2005 senza ch'el saja vegnì duvrà.

Da vischnancas e regiuns
- Claustra: Il project inoltrà da la rezia energia SA cun la dumonda dals 22 da favrer 2005 concernent la construcziun d'ina ovra electrica da dotaziun en connex cun la renovaziun da la serra da Claustra vegn approvà cun cundiziuns.
- Roveredo: La regenza prenda enconuschientscha da la decisiun da la cumissiun administrativa da la cassa da pensiun chantunala dal Grischun (CP) dals 28 da settember 2005 concernent la cumpra da proprietad en condomini en il nov center communal da Roveredo. Las localitads servan exclusivamain al chantun Grischun per installar biros centrals ed unitars ed ina basa per la polizia. Il pretsch da cumpra importa 4'604'100 francs senza custs accessoris.

Contribuziuns chantunalas a differentas instituziuns
- Intermediaziun grischuna da muvel SA: A l'intermediaziun grischuna da muvel SA vegnan concedidas las suandantas contribuziuns per ils onns 2005 e 2006: 100'000 francs sco indemnisaziun pauschala per mantegnair ina infrastructura persunala ed administrativa minimala e 400 francs per animal per ina segirezza extendida sut las medemas premissas sco ils onns precedents.
- SATE Ringstrasse/Pulvermühlestrasse: Il project da construcziun definitiv dals 7 d'avust 2005 per engrondir la cafetaria/la mensa da la SATE a la Ringstrasse/Pulvermühlestrasse 57, Cuira, vegn approvà. Als purtaders vegn empermess ina contribuziun da construcziun chantunala da maximalmain 184'550 francs u 50 pertschient dals custs imputabels. Per in subvenziunament tras il chantun vegn premessa ina contribuziun da l'uffizi federal da furmaziun professiunala e da tecnologia.

Projects da vias
La regenza ha approvà 100'000 francs per construcziuns da metal vi dal sviament da Claustra.

Gremi: regenza
Funtauna: rg chanzlia chantunala dal Grischun