Navigation

Inhaltsbereich

  • Erste Mitteilung
  • Neuen Beitrag einfügen
En general beneventa la regenza grischuna las finamiras ch'ins vul cuntanscher cun questa revisiun parziala da l'ordinaziun federala davart la pestga. Quai èn tranter auter las mesiras da schanetg per glischuns e per pertgas, il scumond da pigliar peschs per las spezias en privel da svanir e l'attribuziun d'incumbensas als chantuns per impedir ch'epidemias da peschs sa derasian. La regenza na va dentant betg d'accord cun la cumprova previsa d'enconuschientschas da la materia per acquistadras e per acquistaders da patentas da pestga. En sia consultaziun a la confederaziun scriva la regenza ch'ella veglia per entant mantegnair la pratica existenta en il chantun, tenor la quala pestgadras e pestgaders ch'èn en vacanzas en il Grischun survegnan patentas da curta durada per quest temp. A media vista stoppian ins dentant empruvar da cuntascher in'armonisaziun naziunala da la furmaziun da las pestgadras e dals pestgaders.

La regenza sustegna la proposta dal cussegl federal tar la revisiun da la lescha davart l'infurmaziun dals consuments
La regenza grischuna sustegna en general la proposta dal cussegl federal tar la revisiun da la lescha davart l'infurmaziun dals consuments. En mintga cas na dastgan restricziuns memia severas en la lescha davart l'infurmaziun dals consuments betg esser in impediment per l'avertura giavischada dal martgà. Quai scriva la regenza en sia consultaziun tar la nova lescha a la confederaziun. In'avertura dal martgà duai tranter auter vegnir favurisada en quel senn che las barrieras tecnicas per il commerzi vegnan eliminadas cun armonisar uschè bain sco pussaivel las prescripziuns svizras davart ils products cun il dretg da la communitad europeica (CE). Per secturs nua che quai n'è betg pussaivel, ha il cussegl federal l'intenziun - sa basond sin il princip da Cassis-de-Dijon che vala en la CE - d'avrir en il futur er il martgà svizzer per products che pon circular libramain en la CE. La regenza grischuna è persvadida che quai è la dretga via e sustegna quest agir.

Energia nucleara: La regenza è perencletga cun la ratificaziun da la convenziun da Paris e da Bruxelles
La regenza grischuna è da princip perencletga cun la ratificaziun da la convenziun da Paris e da Bruxelles per la responsabladad en il sectur da l'energia nucleara. Quai scriva ella en sia consultaziun a l'uffizi federal d'energia tar il conclus federal davart l'approvaziun e la realisaziun da convenziuns per la responsabladad en il sectur da l'energia nucleara. Las consequenzas nuschaivlas d'eventuals accidents nuclears na sa ferman betg al cunfin dal pajais. Correspundentamain duai quest problem vegnir schlià - a l'avis da la regenza - en enclegientscha cun auters stadis. Plinavant correspunda la summa da garanzia augmentada da la confederaziun sin 2,25 milliardas francs tenor l'opiniun da la regenza a la pretensiun minimala da las convenziuns internaziunalas.

Il concept per cumbatter il mal nair dals pumers è avant maun
Il post spezialisà "pumicultura" dal center da furmaziun e cussegliaziun agricula Plantahof a Landquart ha creà en collavuraziun cun il post spezialisà "avieuls" e cun il post spezialisà "protecziun da las plantas" per l'onn 2005 in concept detaglià per cumbatter il mal nair dals pumers. La regenza ha prendì enconuschientscha dal concept ed ha fixà las indemnisaziuns per ils custs che resultan cun runcar e cun dismetter las plantas infestadas. Fixadas èn er vegnidas las indemnisaziuns per ils controlladers dal mal nair dals pumers. Il mal nair dals pumers è ina malsogna bacteriala che attatga pumers cun puma da minz sco mails, pers e cudugns sco er laina selvadia e laina da decoraziun.

Da vischnancas e regiuns
- Arosa: La SA Kursaal & Casino Arosa survegn da la regenza la permissiun per manar ina sala da gieu chantunala e per metter en funcziun maximalmain 20 automats da gieus d'inschign. La permissiun è limitada fin ils 31 da matg 2008.
- Schlarigna: La regenza approvescha la nova lescha davart ils giasts e davart las taxas da turissem.
- Tavau-Claustra: La planisaziun d'utilisaziun per l'engrondiment dals indrizs d'ennavar en ils territoris da sport d'enviern da Tavau e da Claustra vegn approvada da la regenza cun cundiziuns.
- Guarda: La regenza approvescha la midada dal plan da zonas per engrondir il negozi dal Volg.
- Lostallo: La revisiun parziala da la lescha da construcziun sco er differents plans da zona vegnan approvads.
- Vella: La regenza approvescha ina contribuziun chantunala da 114'000 francs per la dustanza en la Val Nulens.
- Regioviamala: La regenza concluda d'adattar il plan directiv chantunal e regiunal en il sectur da l'explotaziun e da l'utilisaziun da material en la regiun da regioviamala. Er l'adattaziun dal plan directiv regiunal, decidida da la regioviamala ils 2 da settember 2005 (sectur "explotaziun da crappa") vegn approvada.
- Surselva: Il project preliminar "lenna renda" ch'è vegnì realisà da la corporaziun regiunala Surselva, da la federaziun forestala dal Grischun Selva, dal guaud dal Grischun, da la federaziun grischuna dals impressaris forestals e da l'uffizi forestal e che serva a meglierar las structuras da la selvicultura en Surselva, vegn approvà da la regenza. Ils collavuraturs da l'uffizi forestal furneschan per quest intent atgnas prestaziuns da 45'000 francs. Plinavant vegn empermessa ina contribuziun chantunala da 7'500 francs.

Contribuziuns chantunalas a differentas instituziuns
Promoziun da la cultura: La regenza conceda totalmain 162'000 francs per 16 ovras ed occurrenzas culturalas.
Secziun Partenz dal club alpin svizzer: Dal fond da sport deliberescha la regenza ina contribuziun chantunala da 13'600 francs per l'engrondiment da la paraid da raiver Hebdiguat a Küblis.
Uniun purtadra da la patinera natirala ed artifiziala a Schiers: La regenza deliberescha ina contribuziun da 6'400 francs als custs d'acquisiziun d'ina nova maschina per elavurar il glatsch.

Projects da vias
La regenza approvescha totalmain circa 2,64 milliuns francs per construir e per sanar divers trajects da via:
- A13 Soazza-San Bernardino
- tunnel dal San Bernardin
- sviament da Flem

Gremi: regenza
Funtauna: rg chanzlia chantunala dal Grischun
Neuer Artikel